BAKI, AzerVoice, Fərid Mikayılov
Yeni açıqlanan 2025 Qlobal Təqaüd Hesabatına əsasən, Portuqaliya, İspaniya və Avstriya bu il də yüksək həyat səviyyəsi, vergi üstünlükləri və təhlükəsizlik göstəricilərinə görə təqaüdçülər üçün dünyanın ən cəlbedici beş ölkəsi sırasında yer alıb.
AzerVoice xəbər verir ki, hesabat Global Citizen Solutions tərəfindən hazırlanıb və yalnız rəsmi təqaüd vizası proqramları olan 44 ölkəni əhatə edir. Qiymətləndirmədə həyat keyfiyyəti, vergi siyasəti, yaşayış dəyəri və vətəndaşlıq əldəetmə imkanları əsas meyar kimi götürülüb.
Hesabatın müəllifi Dr. Laura Madrid bildirib ki, təqaüd yaşına çatdıqdan sonra ölkə dəyişmək artıq azsaylı insanların seçimi deyil, qlobal tendensiyaya çevrilib.
Təqaüd proqramlarının 36 faizi Amerika qitəsində, 32 faizi isə Avropada həyata keçirilir. Bununla belə, Avropa ölkələri vergi şəffaflığı, səhiyyə xidmətlərinin keyfiyyəti və sosial inteqrasiya imkanlarına görə daha yüksək bal toplayıb.
Hesabata əsasən, Portuqaliya təqaüdçülər üçün dünyanın ən əlverişli ölkəsi elan olunub. Ölkə xüsusilə D7 vizası ilə fərqlənir.
Portuqaliya həmçinin mülayim iqlimi, yüksək səviyyəli səhiyyə sistemi və təhlükəsiz mühiti ilə fərqlənir.
İspaniya təqaüdçülər üçün üçüncü, Avstriya isə beşinci yeri tutub. Hər iki ölkə müasir səhiyyə infrastrukturu, yüksək ekoloji standartlar və yaşam keyfiyyəti ilə ön sıralarda yer alır.
Qərbi Avropanın Fransa, Avstriya və İspaniya kimi ölkələri, həmçinin vergi güzəştləri və sosial təhlükəsizlik göstəriciləri ilə də yüksək qiymət alıb.
Amerika qitəsində Panama, Kosta-Rika və Uruqvay vergi azadolmaları və münasib yaşayış xərcləri ilə fərqlənir;
Asiyada Tailand, Malayziya və Filippin isti iqlimi və sadələşdirilmiş viza yeniləmə qaydaları ilə populyardır;
Afrikada isə Mavriki və Kabo-Verde sadə vergi sistemi və çoxmədəniyyətli mühit ilə seçilir.
Hesabata görə, Portuqaliyanın “Qızıl Viza” və D7 proqramları indiyədək 7 milyard avrodan çox birbaşa xarici investisiya cəlb edib. Bu vəsaitin əsas hissəsi daşınmaz əmlak bazarına yönəlib.
İspaniyada isə 2014–2023-cü illər arasında bənzər proqramlar vasitəsilə 4,5 milyard avrodan artıq investisiya cəlb olunub. Lakin Madrid hökuməti son dövrlərdə daşınmaz əmlak əsaslı “Qızıl Viza” proqramını dayandırıb.
