BAKI, AzerVoice, Fərid Mikayılov
Parisin ən məşhur rəmzlərindən biri olan Eyfel Qülləsinin 2026-cı ildə söküləcəyi barədə sosial mediada yayılan məlumatlar tamamilə əsassız çıxıb.
AzerVoice xəbər verir ki, Fransız mətbuatının xəbərinə görə, bu iddialar ölkədə baş verən etirazlar fonunda yaranmış dezinformasiyanın nəticəsidir.
2 oktyabr tarixində Fransanın 200-dən çox şəhərində və qəsəbəsində insanlar hökumətin büdcə xərclərini azaltma siyasətinə etiraz məqsədilə küçələrə çıxıblar. Paytaxt Parisdə minlərlə insanın qatıldığı aksiyalar zamanı təhlükəsizlik məqsədilə Eyfel Qülləsinə giriş müvəqqəti olaraq dayandırılıb.
Bundan az əvvəl isə bir onlayn xəbər portalı Eyfel Qülləsinin “nəhəng slayd və ya konsert salonuna çevriləcəyi” barədə satirik (zarafat xarakterli) məqalə dərc etmişdi. Lakin bu yazı sosial şəbəkələrdə gerçək xəbər kimi təqdim edilərək, “Eyfel Qülləsi 2026-cı ildə söküləcək” başlığı altında dezinformasiya kampaniyasına çevrilib.
X platformasında milyonlarla izləyicisi olan səhifələr “bir dövrün sonu” kimi ifadələrlə bu iddiaları paylaşaraq xəbəri daha da şişirdiblər.
Saxta xəbərlərdə deyilirdi ki, “Eyfel Qülləsinin 135 illik istismar icazəsi başa çatıb və struktur yorğunluğu, yüksək baxım xərcləri və ictimai narazılıqlar səbəbindən 2026-cı ildə söküləcək.”
Bəzi istifadəçilər bu xəbərlərə inanaraq emosional paylaşımlar ediblər.
Eyfel Qülləsini idarə edən “Société d’Exploitation de la Tour Eiffel” (SETE) şirkəti məsələ ilə bağlı hələlik rəsmi açıqlama yaymayıb. Bununla belə, turistlərin hələ də rəsmi vebsayt üzərindən bilet sifarişi edə bildikləri qeyd olunur.
Ekspertlər xəbərdarlıq edirlər ki, bu cür yalan və manipulyativ məlumatlar, xüsusilə turizmə əsaslanan şəhərlərdə həm çaşqınlığa, həm də iqtisadi itkilərə səbəb ola bilər.
Bu ilin əvvəlində İtaliya hökuməti, hotellər və restoranlar barədə saxta onlayn rəylərin turizm sektoruna zərər vurduğunu açıqlamışdı. Rəsmi məlumatlara görə, bu tip manipulyativ xəbərlər turizm gəlirlərini 6–30 faiz arasında azalda bilir.
İtaliya hökuməti bu səbəbdən yeni qaydalar qəbul edərək, turistlərin rəylər paylaşmadan əvvəl səfər təsdiqini təqdim etməsini tələb edən sistem tətbiq edib.
