BAKI, AzerVoice, Fərid Mikayılov
Avropa İttifaqına (Aİ) üzv dövlətlər Rusiyadan təbii qaz və mayeləşdirilmiş təbii qazın (LNG) idxalına 2028-ci ilin əvvəllərindən tamamilə son qoyulması planına dəstək verib.
AzerVoice xəbər verir ki, Lüksemburqda keçirilən enerji nazirlərinin iclasında üzv ölkələr Rusiyadan qaz idxalının mərhələli şəkildə dayandırılmasına dair qaydalar üzərində razılığa gəliblər.
Bəyan edilib ki, üzv ölkələr bu qərarla Rusiyadan enerji asılılığını aradan qaldırmaq və enerji təhlükəsizliyini gücləndirmək məqsədilə hərəkət edir. Təklif edilən yeni qaydalara əsasən, 1 yanvar 2028-dən etibarən Rusiyadan qaz idxalı tam qadağan ediləcək.
Yeni plana görə, 1 yanvar 2026-dan yeni qaz müqavilələrinin bağlanması, 17 iyun 2026-dan qısamüddətli müqavilələr, 1 yanvar 2028-dən isə uzunmüddətli müqavilələr üzrə idxal dayandırılacaq.
Bununla yanaşı, qaz təchizatında çətinliklə üzləşə biləcək dənizə çıxışı olmayan Aİ ölkələrinə məhdud istisna və çeviklik imkanı veriləcək. Qanun layihəsi Avropa İttifaqı və Avropa Parlamenti tərəfindən təsdiqləndikdən sonra qüvvəyə minəcək.
2021-ci ildə Aİ istifadə etdiyi qazın 45 faizini Rusiyadan idxal edirdi, lakin bu göstərici 2024-cü ilə qədər 19 faizə qədər azalıb. Bununla belə, bir sıra Aİ ölkələri hələ də Rusiyadan boru kəməri və LNG qazı almaqda davam edir.
Rusiya enerji nəhəngi “Qazprom”un prezidenti Aleksey Miller Avropa enerji bazarının mürəkkəb mərhələdən keçdiyini bildirib.
Miller qeyd edib ki, Rusiya bu il “Sibirin Gücü-1” boru kəməri vasitəsilə Çinə 38 milyard kubmetrdən çox qaz nəql edəcək.
Miller əlavə edib ki, soyuq hava şəraiti halında Avropa qaz bazarında yenidən qiymət dalğalanmaları və təchizat problemləri qaçılmaz olacaq.
