BAKI, AzerVoice, Nailə Babazadə
İranın xarici işlər naziri Abbas Əraqçi bəyan edib ki, Vaşinqton öz “tamahkar və təkəbbürlü siyasətindən” imtina etmədikcə Tehran ABŞ-la danışıqlara qayıtmayacaq.
AzerVoice xəbər verir ki, rəsmi İSNA agentliyinin xəbərinə görə, Əraqçi jurnalistlərə açıqlamasında bildirib ki, “ABŞ-lı tərəflə əvvəlki dövrlərdə aparılan danışıqlar, o cümlədən Nyu-Yorkda baş tutan görüşlər, Vaşinqtonun həddindən artıq tələbləri və qeyri-real iddiaları səbəbindən dayandırılıb”.
Nazir Məşhəd şəhərində keçirilən İkinci Regional Diplomatiya Konfransının kənarında çıxış edib.
“ABŞ öz ifrat siyasətindən və İrana qarşı qeyri-məntiqli tələblərindən əl çəkmədiyi müddətcə biz danışıqlar masasına qayıtmayacağıq.”-deyə nazir bildirib.
Əraqçi həmçinin qeyd edib ki, ABŞ-ın Yaxın Şərq üzrə elçisi Stiv Vitkof hazırda vasitəçilər vasitəsilə Tehranla əlaqə saxlayır.
“İranın mövqeyi aydındır.İslam Respublikası sülhə və diplomatiyaya inanır. Biz daim diplomatik yanaşmanı dəstəkləmişik, lakin bu, xalqımızın haqlarından imtina etmək demək deyil.” - deyə Əraqçi bildirib.
Nazir əlavə edib ki, Tehran ölkə maraqlarını diplomatik yollarla qorumaq üçün bütün səyləri göstərəcək, lakin qarşı tərəf dəfələrlə diplomatiyaya sadiq olmadığını sübut edib.
“Bu il də beş raund danışıqlardan sonra ABŞ, İsrailin İrana qarşı hərbi hücumuna qoşularaq diplomatik öhdəliklərini pozdu,” – deyə Əraqçi vurğulayıb.
Əraqçinin bu bəyanatı, İranın ali lideri Ayətullah Əli Xameneyinin iki gün öncə ABŞ Prezidenti Donald Trampın danışıqlar təklifini rədd etməsindən sonra səslənib.
