BAKI, AzerVoice, Nailə Babazadə
İran Xarici İşlər Nazirliyinin sözçüsü İsrail rejiminin İordan çayının Qərb sahilinin ilhaqına dair Knessetdə qəbul etdiyi qətnaməni Birləşmiş Millətlər Təşkilatının Nizamnaməsində əks olunan prinsiplərin və məqsədlərin açıq şəkildə pozulması kimi qiymətləndirib və onu sərt şəkildə qınayıb.
AzerVoice xəbər verir ki, Bəqai bu qətnaməni sionist rejimin cinayətkar və müstəmləkəçi genişlənmə siyasəti yolunda atdığı növbəti addım adlandırıb. O vurğulayıb ki, bu siyasət səkkiz onillikdir fələstin xalqının öz müqəddəratını təyin etmə kimi fundamental hüququnun pozulmasına səbəb olur və beynəlxalq hüququn imperativ normalarını, xüsusilə də xalqların öz müqəddəratını təyin etmə hüququnu tapdalayır.
İordan çayının Qərb sahilində insan haqlarının və humanitar hüququn davam edən kobud şəkildə pozulmalarına, eləcə də Qəzzadakı soyqırıma istinad edən Bağəi bildirib ki, sionist rejimin Qərb sahilində elan etdiyi və həyata keçirdiyi siyasət — “Böyük İsrail” xülyəsinin təkrarı, yeni yaşayış məntəqələrinin yaradılması və Knessetdə yeni qətnamələrin qəbul edilməsi — bu rejimin işğal altındakı bütün Fələstində hərtərəfli etnik təmizləmə planını təsdiqləyir.
O, bu vəziyyətin bütün dövlətlərin Fələstinin “müstəmləkəvi məhvinin” qarşısını almaq üçün səmərəli tədbirlər görmək məsuliyyətini daha da gücləndirdiyini qeyd edib.
Bəqai İslam ölkələrini və beynəlxalq ictimaiyyəti fələstin xalqının tarixi hüquqlarının açıq şəkildə pozulmasının qarşısını almaq üçün təcili addımlar atmağa çağırıb və Birləşmiş Millətlərin Fələstinin kimliyinə və fələstinlilərin hüquqlarına qarşı sionist rejimin davamlı hücumlarını dayandırmaq məsuliyyətini xatırladıb.
