BAKI, AzerVoice, Nailə Babazadə
Sudan Həkimlər Birliyi ölkənin qərbində yerləşən Şimali Darfur əyalətinin paytaxtı Faşir şəhərində 177 min nəfərin hələ də mühasirədə qaldığını və ölənlərin sayının minlərlə olduğunu bildirib.
AzerVoice xəbər verir ki, birlikdən yayılan açıqlamada, Sürətli Dəstək Qüvvələrinin (RSF) şəhəri ələ keçirməsindən sonra Faşirdə baş verən “vəhşi qırğın və humanitar fəlakət” kəskin şəkildə pislənib.
Bəyanatda vurğulanıb ki, Faşirdə baş verənlər “soyqırım, sistematik etnik təmizləmə və tammiqyaslı müharibə cinayətidir.”
“RSF oktyabrın 28-də etnik zəmində qətliam törədərək silahsız mülki şəxsləri hədəf alıb. Əlaqə kəsintiləri və təhlükəsizlik çatışmazlığı səbəbindən ölənlərin dəqiq sayı bilinmir, lakin bu rəqəmin minlərlə olduğu ehtimal edilir,” – deyə açıqlamada bildirilib.
Məlumatda qeyd olunur ki, RSF qüvvələri şəhərə daxil olduqdan sonra ilk saatlarda təxminən 2 min dinc sakin öldürülüb, bir çox günahsız insan diri-diri yandırılıb. Şəhərdə qalan 177 min nəfərin əksəriyyətinin toplu şəkildə qətlə yetirildiyi, avtomobilləri ilə qaçmağa çalışanların isə maşınlarının içində yandırıldığı bildirilir.
Həkimlər Birliyi həmçinin RSF qüvvələrinin şəhərdəki xəstəxanələri, tibb mərkəzlərini və aptekləri qarət etdiyini qeyd edib.
“Faşirdəki Səudiyyə Xəstəxanasında 450-dən çox xəstə və yaralı güllələnib, səyyar səhra xəstəxanalarında isə təxminən 1200 yaşlı, yaralı və xəstə öldürülüb,” – deyə bəyanatda vurğulanıb.
Bildirilib ki, şəhərdə genişmiqyaslı insan haqları pozuntularının sənədləşdirilməsi davam edir. Bu pozuntular arasında “yerindəcə edamlar, ev basqınları, cinsi zorakılıq və qurbanların öz məzarlarını qazmağa məcbur edilərək diri-diri basdırılması” kimi hadisələr yer alır.
Qeyd edək ki, Sudanda 2023-cü ilin 15 aprelindən bəri ordu ilə xarici dəstəkli RSF qüvvələri arasında şiddətli döyüşlər davam edir. Darfur bölgəsinin ən böyük şəhəri Faşir uzunmüddətli qarşıdurmalardan sonra əsasən RSF-nin nəzarətinə keçib.
On minlərlə insan döyüşlərdən qaçmaq məcburiyyətində qalıb. Sosial mediada yayılan videolarda RSF qüvvələrinin sivilləri zorla evlərindən çıxardığı, silahsız insanları qətlə yetirdiyi və işgəncələrə məruz qoyduğu anlar əks olunub.
