BAKI, AzerVoice, Nailə Babazadə
Tayland, Kamboca ilə imzaladığı anlaşmanı müddətsiz olaraq dayandırdığını açıqladıqdan sonra Kamboca sərhədində bir kəndi hədəf alıb. Kamboca Müdafiə Nazirliyi bildirib ki, hücum nəticəsində 5 nəfər yaralanıb.
AzerVoice xəbər verir ki, nazirlik hücumu “ən sərt şəkildə” pisləyərək, bu hərəkətləri anlaşmanın ciddi pozulması kimi qiymətləndirib və Taylandı “bölgədə sülh və sabitliyi təhdid edən fəaliyyətlərini dərhal dayandırmağa” çağırıb.
Öz növbəsində, Tayland tərəfi Kamboca hərbçilərinin öz ərazisinə atəş açdığı barədə məlumat aldıqlarını və buna qarşı xəbərdarlıq atəşi həyata keçirdiklərini açıqlayıb. Xarici İşlər Nazirliyinin sözçüsü Nikorndej Balankura, Tayland ordusunun hərəkətini “meşru müdafiə çərçivəsində və beynəlxalq hüquqa uyğun” olaraq qiymətləndirib.
Tayland, sərhəddə devriyyə gəzən bir əsgərin mina partlaması nəticəsində ayağını itirdiyini və Kamboca üzr diləyənə qədər anlaşmanı dayandıracağını əvvəlcədən bildirmişdi. Həmçinin, anlaşma çərçivəsində sərbəst buraxılması planlanan 18 Kamboca əsgərinin iadesinin də müddətsiz təxirə salınacağını açıqlayıb.
Qeyd edək ki, Tayland və Kamboca arasında 817 kilometr sərhəd mövcuddur və uzun müddətdir torpaq mübahisələri mövcuddur. İki ölkə 26 oktyabrda Kuala Lumpurda keçirilən 47-ci ASEAN Zirvəsində ABŞ Prezidenti Donald Trampın iştirakı ilə anlaşma imzalamışdı.
Kamboca sərhəd münaqişələrindən sonra imzalanan sənədə sadiqliyini yenidən təsdiqləyib və iki ölkənin sərhəd bölgələrində ağır silahları geri çəkdiyini açıqlayıb.
