BAKI, AzerVoice, Nailə Babazadə
Perunun keçmiş dövlət başçısı Martin Viskarra rüşvət alma ittihamı ilə 14 il müddətinə azadlıqdan məhrum edilib. O, eyni zamanda 9 il ərzində dövlət qulluğunda çalışmaqdan məhrum olunub.
AzerVoice xəbər verir ki, paytaxt Lima şəhərində keçirilən məhkəmə prosesində Viskarranın 2011–2014-cü illərdə Moqueqa bölgəsinin rəhbəri olduğu dövrdə bəzi iş adamlarından onları dövlət tenderlərində üstün tutmaq üçün pul aldığı iddia olunub.
Məhkəmə, təqdim olunan ittihamları əsas götürərək Viskarranı rüşvət almaqda təqsirli bilib və ona 14 il həbs cəzası verib. Hökmlə yanaşı, ona 9 il müddətinə dövlət vəzifələrində çalışma qadağası da tətbiq edilib.
Qərara etiraz edən Viskarra özünü təqsirsiz adlandıraraq bildirib ki, “Özəl sektor nümayəndələri məhkəmə prosesi boyunca təsdiqləyə bilmədikləri ifadələr verdilər. Bu hökmü haqlı çıxaracaq heç bir əsas yoxdur.”
Mətbuatın yazdığına görə, sabiq prezidentin digər keçmiş dövlət başçıları ilə birlikdə Barbadillo Həbsxanasına göndərilməsi gözlənilir. Bununla da o, Alehandro Toledo, Ollanta Humala və Pedro Kastilyodan sonra həmin həbsxanaya göndərilən dördüncü sabiq prezident ola bilər.
Peru son illərdə istefalar, vəzifədən uzaqlaşdırmalar və siyasi böhranlarla müşayiət olunan dərin siyasi qeyri-sabitlik dövründən keçir. 2018-ci ildən bəri ölkədə müxtəlif səbəblərlə yeddi dövlət başçısı vəzifədən kənarlaşdırılıb.
