BAKI, AzerVoice, Nailə Babazadə
Banqladeş ölkədəki məhkəmə Britaniyalı millət vəkili və keçmiş nazir Tulip Sidiqin üzərindəki korrupsiya işi üzrə onun barəsində iki il müddətinə həbs hökmü çıxarıb. İş, bir torpaq sahəsinin qanunsuz şəkildə ayrılması ilə bağlıdır.
AzerVoice xəbər verir ki, hökm qiyabi şəkildə elan olunub. Tulip Sidiq, eləcə də onun xalası – Banqladeşin keçmiş baş naziri Şeyx Hasina və Hasinanın bacısı Şeyxa Reyhana məhkəmədə iştirak etməyiblər. Hər üçü iş üzrə ittiham olunan şəxslər siyahısında yer alır.
Yerli məlumatlara əsasən, məhkəmə Hasinanı beş il, Reyhananı isə yeddi il həbs cəzasına məhkum edib.
Xatırladaq ki, 2024-cü ilin avqustunda kütləvi hökumət əleyhinə etirazların fonunda Hindistana qaçan Şeyx Hasina ötən ay nümayişçilərə qarşı tətbiq olunmuş zorakılığa görə ölüm cəzasına məhkum edilmişdi. Bir neçə gün əvvəl isə ona digər korrupsiya işləri üzrə 21 il müddətinə həbs hökmü verilmişdi.
Prokurorluq bildirib ki, torpaq sahəsi yüksək vəzifəli rəsmilərlə əlbir olaraq siyasi nüfuzdan sui-istifadə yolu ilə qanunsuz şəkildə ayrılıb. İttihama görə, üç qadın – Hasina, Reyhana və Tulip Sidiq – Hasinanın baş nazir olduğu dövrdə təxminən 13 610 kvadrat futluq torpaq sahəsini əldə etmək üçün öz səlahiyyətlərindən istifadə ediblər.
İttiham olunan 17 nəfərin əksəriyyəti hökm oxunarkən məhkəmədə iştirak etməyib.
Tulip Sidiq isə bu ittihamları əvvəlcədən rədd edərək onların “siyasi motivli qaralama kampaniyası” olduğunu bildirib. O, 2024-cü ilin yanvarında Böyük Britaniyada maliyyə xidmətləri və korrupsiyaya qarşı mübarizə üzrə məsul nazir postundan Hasina ilə maliyyə əlaqələri ilə bağlı yoxlamaların fonunda istefa vermişdi.
Hazırda Britaniya ilə Banqladeş arasında ekstradisiya müqaviləsi mövcud deyil.
