BAKI,AzerVoice, Nailə Babazadə
Avstraliyada 16 yaşdan kiçik uşaqların sosial mediaya girişini qadağan edən yeni qaydanın qüvvəyə minməsinə günlər qalmış, ABŞ-ın texnologiya şirkəti Meta, Facebook və İnstagramda təxminən yarım milyon hesabı bağlamağa başlayıb.
AzerVoice xəbər verir ki, 10 dekabrda tətbiq olunacaq qadağaya əsasən, Meta noyabr ayında etdiyi açıqlamadan sonra, bu gündən etibarən 16 yaşdan kiçik olduğunu müəyyən etdiyi istifadəçilərin hesablarını deaktiv etməyə başlayıb.
Meta həmçinin, Avstraliyadakı bu istifadəçilərin yeni hesab açmasının qarşısını almağa başlayıb.
Meta-nın sözçüsü açıqlamasında bildirib ki, 16 yaşdan kiçik istifadəçilər Instagram, Threads və Facebookdakı rəqəmsal məzmunlarını yükləyə biləcək, 16 yaşına çatmadan əvvəl hesablarını yenidən açmaq imkanı barədə məlumatlandırılacaqlar və məzmunları eyni şəkildə geri yüklənəcək.
Avstraliya Rabitə Naziri Anika Wells açıqlamasında qeyd edib ki, yaş doğrulama sistemi mövcud hesabları filtrələmək üçün zaman alacaq, amma qayda geri çəkilmədən tətbiq olunacaq.
Meta-nın məlumatına görə, ölkədə 13-15 yaş arasında təxminən 350 min Instagram və 150 min Facebook istifadəçisi mövcuddur.
Bu arada, Avstraliyada 15 yaşlı iki gənc, qaydaya qarşı Ali Məhkəmədə xüsusi məhkəmə iclası keçirmək hüququ qazanıb.
Məhkəməyə təqdim edilən ərizədə bildirilir ki, qadağa sosial medianın “zərərli xüsusiyyətlərini hədəfləmir”, əksinə, 13-15 yaş arası gənclərin ifadə azadlığını geniş şəkildə məhdudlaşdırır.
Tərəflər razılaşıblar ki, məsələ ən erkən 2026-cı ilin fevralında xüsusi bir iş çərçivəsində araşdırılsın. Buna görə də qadağa, 10 dekabrda planlandığı kimi qüvvəyə minəcək.
Avstraliyadakı yeni qanunvericiliyə görə, YouTube, Facebook, TikTok, Snapchat, Reddit, Instagram və X kimi qlobal sosial media platformaları 10 dekabrdan etibarən qanuna əməl etməsələr, təxminən 33 milyon dollaradək cərimə ilə üzləşə bilərlər.
