BAKI, AzerVoice, Nailə Babazadə
ABŞ Prezidenti Donald Tramp, Tayland və Kamboca arasında atəşkəsə baxmayaraq yenidən başlayan sərhəd münaqişəsini bir neçə telefon danışığından sonra “yoluna qoyacağını” bildirib.
AzerVoice xəbər verir ki, Tramp, Respublikaçı və Demokrat Konqres üzvlərini Ağ Evdə qarşıladığı Yeni İl tədbirində gündəmdəki məsələlərə toxunub.
Tayland və Kamboca arasındakı son dövrdə başlayan münaqişə xaricində, prezidentlik dönəmində dünya üzrə 8 münaqişəni sona çatdırdığını qeyd edib.
“Düşünürəm ki, Tayland məsələsi ilə bağlı bir neçə telefon danışığı etməliyəm, amma onu da yoluna qoyacağıq.” - deyə Tramp qeyd edib.
Ölkəsinin əvvəlki dövrlə müqayisədə yaxşı vəziyyətə gəldiyini deyən Tramp, digər ölkələrin liderlərinin də bunu qeyd etdiyini bildirib.
“Avropa ölkələri də bunu deyir. Avropa ölkələri başçınızın eyni zamanda Avropanın da lideri ola biləcəyini bildirir. Bizi dinləyirlər və əvvəlkindən daha çox hörmət göstərirlər.” - deyə Tramp əlavə edib.
Tayland və Kamboca arasında atəşkəsə baxmayaraq sərhəd gərginliyi artmağa davam edir. Bir neçə gün əvvəl döyüşlərin yenidən başlaması ilə iki ölkə bir-birini məsuliyyət daşımaqda günahlandırıb.
Hər iki ölkədən yüz minlərlə insan sərhəd bölgələrindən köçürülüb və davam edən toqquşmalarda ölən və yaralananların sayı artır.
