BAKI, AzerVoice, Nailə Babazadə
ABŞ-ın dövlət katibi Marko Rubio Venesuelaya qarşı müharibə aparmadıqlarını, narkotik kartellərinə qarşı mübarizə apardıqlarını iddia edərək, iqtisadi blokada vasitəsilə “bu ölkənin gələcək istiqamətinin ABŞ tərəfindən müəyyən ediləcəyini” bildirib.
AzerVoice xəbər verir ki, ABŞ-ın Venesuelaya hərbi müdaxiləsi nəticəsində Venesuela Prezidenti Nikolas Maduronun saxlanılması ilə bağlı Amerika mediasına müsahibələr verən Rubio hərbi əməliyyatı müdafiə edib.
ABC News kanalına danışan ABŞ dövlət katibi Venesuelaya məxsus neft tankerlərinə hələ də karantin tətbiq olunduğunu bildirib və bu yolla Karakasın iqtisadi baxımdan ABŞ-ın istəmədiyi addımları ata bilməyəcəyini deyib.
Rubio, “Burada idarə etdiyimiz məsələ bu prosesin gələcəkdə hansı istiqamətdə inkişaf edəcəyidir. Tankerlərə tətbiq olunan karantin bu mövzuda əlimizdə olan əsas vasitədir”, — deyə qeyd edib.
NBC News kanalındakı proqramda Rubiodan Venesuelada neçə ABŞ hərbçisinin olduğu soruşulub. O isə “ABŞ ordusunun bu ölkədə daimi olaraq yerləşdirilmiş əsgəri yoxdur” cavabını verib.
Rubio bildirib ki, “Venesuelada sahədə əsgərimiz yoxdur. Maduronu yaxalamaq üçün təxminən iki saatlıq müddətə bu ölkəyə hərbçilər göndərildi”.
ABŞ dövlət katibi Venesuela mənşəli “şübhəli narkotik gəmilərinə” qarşı hücumların davam etdiriləcəyini və sanksiya tətbiq olunan gəmilərin ələ keçiriləcəyini də açıqlayıb.
Rubio, “Biz burada narkotik qaçaqmalçılığı ilə məşğul olan təşkilatlarla mübarizə aparırıq. Bu, Venesuelaya qarşı müharibə deyil”, — deyə vurğulayıb.
Xatırladaq ki, Venesuelanın paytaxtı Karakasda bir gün əvvəl yerli vaxtla təxminən saat 02:00-da partlayış və təyyarə səsləri eşidilmişdi. Hadisədən sonra Venesuela hakimiyyəti ABŞ-ı ölkənin müxtəlif bölgələrində mülki və hərbi obyektlərə hücum etməkdə ittiham edib.
ABŞ Prezidenti Donald Tramp Venesuela Prezidenti Nikolas Maduroya qarşı genişmiqyaslı hücum həyata keçirildiyini, Maduronun və həyat yoldaşının ölkə xaricinə çıxarıldığını açıqlamışdı.
ABŞ-ın ədliyyə naziri Pam Bondi isə Nikolas Maduro və həyat yoldaşı Siliya Flores barəsində ABŞ-da cinayət işi qaldırıldığını, Maduronun “narkotik terrorizmi, kokain qaçaqmalçılığı, ABŞ-a qarşı avtomatik silah və dağıdıcı qurğulara sahib olmaq” ittihamları ilə üzləşdiyini bildirmişdi.
Venesuela rəhbərliyi ABŞ-ın hərəkətlərinin beynəlxalq ictimaiyyət tərəfindən pislənməsi üçün çağırış edib. Bəzi ölkələr hücumu tənqid edərkən, digərləri açıqlamaları ilə ABŞ-a dəstək verdiklərini bəyan ediblər.
