BAKI, AzerVoice, Nailə Babazadə
Banqladeşdə 2024-cü ildə Baş nazir Şeyx Hasinanın devrilməsi ilə nəticələnən xalq üsyanından sonra ilk dəfə keçiriləcək ümumi seçkilərin təşviqat kampaniyasına başlanılıb. Ölkə daxilində keçirilən mitinqlər fevralın 12-nə təyin edilmiş seçkilərə böyük marağın olduğunu nümayiş etdirir.
AzerVoice xəbər verir ki, seçki marafonunun əsas iştirakçıları olan Banqladeş Millətçi Partiyası (BNP) və Banqladeş Camaat-e-İslami Partiyası kampaniyaya müvafiq olaraq Silhet şəhəri və paytaxt Dakkada on minlərlə tərəfdarının iştirakı ilə start verib. Banqladeşin 170 milyonluq əhalisinin təxminən 128 milyonu səsvermə hüququna malikdir. Bu seçkilər Hasinanın devrilməsindən sonra yaranan siyasi qeyri-sabitliyə son qoyaraq ölkənin daxili və regional dinamikasını yenidən formalaşdıracaq.
Camaat-e-İslami Partiyasının sözçüsü Ahsanul Məhbub Zubair "Arab News"a verdiyi açıqlamada korrupsiya və terrorizmdən azad, gənclərin işlə təmin olunduğu və qadınların hüquqlarının qorunduğu bir ölkə qurmaq istədiklərini bildirib. Şeyx Hasinanın 15 illik hakimiyyəti dövründə təzyiqlərə məruz qalan bu partiya hazırda tələbə liderlərin yaratdığı Milli Vətəndaş Partiyasının (NCP) da daxil olduğu 10 partiyalı alyansa rəhbərlik edir.
BNP sədri və keçmiş Baş nazir Xalidə Ziyanın oğlu Tariq Rəhman hazırda baş nazir postuna ən güclü namizəd hesab olunur. O, milyonlarla işsiz gənc üçün iş yerləri yaratmağa və qadınların iqtisadi müstəqilliyini dəstəkləməyə söz verib. Qarşıdan gələn seçkilərdə parlamentdəki 300 yer uğrunda 1800-dən çox namizəd mübarizə aparır.
2024-cü ilin avqustundan bəri müvəqqəti hökumətə rəhbərlik edən 85 yaşlı Nobel Sülh Mükafatı laureatı Məhəmməd Yunus seçkilərdən sonra vəzifəsindən gedəcəyini açıqlayıb. O, ABŞ səfiri Brent Kristensen ilə görüşündə bu seçkilərin gələcək səsvermələr üçün bir standart və etalon olacağını vurğulayıb.
Xatırladaq ki, Şeyx Hasinanı Hindistana qaçmağa məcbur edən 2024-cü il üsyanı dövlət qulluğunda kvota sisteminə qarşı tələbə etirazları ilə başlamışdı. BMT-nin İnsan Hüquqları Ofisinin məlumatına görə, təhlükəsizlik qüvvələrinin sərt müdaxiləsi nəticəsində azı 1400 nəfər həlak olub. Dakkadakı xüsusi tribunal Hasinanı insanlığa qarşı cinayətlərdə təqsirli bilərək noyabr ayında qiyabi olaraq ölüm hökmünə məhkum edib. Məhəmməd Yunus administrasiyası Hasinanın "Avami Liqası" partiyasının bütün fəaliyyətlərini qadağan etdiyi üçün köhnə iqtidar partiyası seçkilərdə iştirak edə bilmir.
Banqladeşdə sonuncu dəfə 2024-cü ilin yanvarında keçirilən seçkilər müxalifət tərəfindən boykot edilmiş və saxtakarlıq iddiaları ilə müşayiət olunmuşdu. Bu dəfə isə ölkədə əsl bayram əhval-ruhiyyəsi hökm sürür. Seçicilər 17 ildən sonra ilk dəfə azad şəkildə səs verə biləcəkləri üçün böyük ümidlər bəsləyirlər.
