BAKI, VOA, Nailə Babazadə

Kuba sahilində 5,8 ballıq güclü zəlzələ qeydə alınıb.

VOA xəbər verir ki, ABŞ Geoloji Araşdırmalar Mərkəzi (USGS) tərəfindən verilən məlumata görə, yeraltı təkanların episentri ölkənin şərqində yerləşən Qvantanamo bölgəsinə tabe olan Maisi məntəqəsinin 49 kilometr cənub-qərb sahillərində yerləşib.

Zəlzələnin ocağının yerin təxminən 11,6 kilometr dərinliyində olduğu müəyyən edilib. Təkanlar bölgədə qısa müddətli təşvişə səbəb olsa da, ilkin məlumatlara görə hadisə nəticəsində hər hansı can itkisi, yaralanma və ya ciddi maddi ziyan qeydə alınmayıb.

Mütəxəssislər tərəfindən aparılan araşdırmalardan sonra bölgədə hər hansı bir sunami təhlükəsinin olmadığı açıqlanıb. Hazırda yerli hakimiyyət orqanları zəlzələnin baş verdiyi əraziyə yaxın yaşayış məntəqələrində monitorinqləri davam etdirir.