BAKI, VOA , Nailə Babazadə
"ABC News"un peyk görüntüləri və təsdiqlənmiş videoların analizinə əsaslanan hesabatına görə, İran və onun dəstəklədiyi qruplar ABŞ və müttəfiqlərinin raketdən müdafiə infrastrukturunun əsasını təşkil edən erkən xəbərdarlıq sistemlərini hədəf alıb.
VOA xəbər verir ki, məlumata görə, 28 fevraldan bəri artan gərginlik fonunda ən az 10 radar obyekti Tehran administrasiyasına məxsus pilotsuz uçuş aparatları (PUA) və raketlərlə vurulub.
Peyk görüntüləri hər biri yüz milyonlarla dollar dəyərində olan və nadir komponentlərdən hazırlanan radar sistemlərinə ciddi ziyan dəydiyini göstərir. Zərbə endirilən obyektlər arasında THAAD raketdən müdafiə sistemlərini dəstəkləyən AN/TPY-2 radar komponentlərinin də olduğu qeyd edilir. Ekspertlərin fikrincə, bu radarların sıradan çıxarılması hava hücumundan müdafiə sistemlərini "qismən kor" hala gətirir və erkən xəbərdarlıq qabiliyyətini zəiflədir.
Bundan əlavə, Yaxın Şərqdə ABŞ hərbçilərinin yerləşdiyi bazalarda logistik binalar, anqarlar və yanacaq depoları da daxil olmaqla ən az 25 nöqtənin vurulduğu təsdiqlənib. İranın bu yüksək xərclə hədəfləri seçməsi rəqibin müdafiə qabiliyyətini minimuma endirmək strategiyasının bir hissəsi kimi qiymətləndirilir.
Xatırladaq ki, fevralın 28-də ABŞ və İsrailin İrana qarşı başlatdığı əməliyyatlardan sonra İran Qətər, BƏƏ və Bəhreyn kimi ölkələrdəki ABŞ bazalarını hədəf almağa başlayıb. İran rəsmilərinin son məlumatına görə, münaqişə nəticəsində ölənlərin sayı 1348-ə çatıb.
