BAKI, VOA, Nailə Babazadə
ABŞ-ın Bağdaddakı səfirliyi İraqdakı Amerika vətəndaşlarına ölkəni dərhal tərk etmələri barədə növbəti dəfə təcili xəbərdarlıq edib.
VOA xəbər verir ki, səfirliyin "X" sosial platformasındakı rəsmi hesabında paylaşılan bəyanatda bildirilir ki, İranla əlaqəli "iraqlı terrorçu milis qrupları" yaxın 24-48 saat ərzində Bağdadın mərkəzində genişmiqyaslı hücumlar təşkil edə bilər. Diplomatik missiya qeyd edib ki, bu qruplaşmalar artıq İraq Kürd Regional Rəhbərliyi də daxil olmaqla, ölkənin müxtəlif bölgələrində ABŞ vətəndaşlarını və Amerikanın maraqlarını hədəf alan silsilə hücumlar həyata keçiriblər.
Xəbərdarlıqda vurğulanır ki, hədəf dairəsi kifayət qədər genişdir; bura Amerika şirkətləri, universitetlər, diplomatik təsisatlar, enerji infrastrukturu, mehmanxanalar və hava limanları ilə yanaşı, İraqın dövlət qurumları və mülki obyektləri də daxildir. Səfirlik həmçinin milislərin amerikalıları qaçırmaq məqsədilə hədəf aldığını bildirərək, vətəndaşlardan təhlükəsizlik riskləri səbəbindən Bağdad səfirliyinə və ya Ərbil baş konsulluğuna getməyə çalışmamalarını xahiş edib. Hazırda İraq üçün ən yüksək — 4-cü səviyyəli səyahət xəbərdarlığı qüvvədədir.
Bəyanatda İraq hökumətinin ünvanına da kəskin tənqidlər yer alıb. ABŞ tərəfi iddia edir ki, Bağdad administrasiyası ölkə daxilində baş verən və ya İraq ərazisindən qaynaqlanan terror hücumlarının qarşısını almaqda acizdir. Hətta bəzi milis qruplarının birbaşa İraq hökuməti ilə əlaqəli ola biləcəyi, hücumçuların isə özlərini dövlət qulluqçusu kimi təqdim edən saxta sənədlər daşıdıqları irəli sürülüb. ABŞ missiyası bəzi işçilərin məcburi təxliyəsinə baxmayaraq fəaliyyətini davam etdirsə də, vətəndaşlarına "İraqa səyahət etməyin, oradasınızsa dərhal çıxın" çağırışını təkrarlayıb.
