BAKI,VOA, Nailə Babazadə
Almaniyanın xarici işlər naziri İohann Vadeful ABŞ Prezidenti Donald Trampın NATO alyansı ilə bağlı səsləndirdiyi fikirlərin Berlin tərəfindən narahatlıqla qarşılandığını bildirib.
VOA xəbər verir ki,"Funke Medya" qrupuna müsahibə verən nazir, dünyanın getdikcə daha təhlükəli bir məkana çevrildiyini və belə bir şəraitdə NATO müttəfiqlərinin daha sıx birləşməli olduğunu vurğulayıb. Vadeful NATO-nu dünyanın ən uğurlu müdafiə ittifaqı adlandıraraq, tərəfdaşların ortaq hədəfləri bölüşməsinin vacibliyini qeyd edib.
Nazir avropalı müttəfiqlərin müdafiə xərclərini ümumi daxili məhsulun (ÜDM) 5 faizinə çatdırmaq barədə öhdəlik götürdüklərini xatırladaraq, "Heç vaxt olmadığı qədər güclüyük" deyib. Donald Trampın NATO-nu "kağız pələng" adlandırması və ABŞ-ın ittifaqdan çıxacağı ilə bağlı təhdidlərinə toxunan Vadeful, bu növ çıxışların narahatlıq doğurduğunu gizlətməyib. O, Almaniyanın ittifaqa sadiqliyinin və qətiyyətli duruşunun ABŞ-ı bu uğur hekayəsini birlikdə davam etdirməyə inandıracağına ümid etdiyini bildirib.
Vadeful həmçinin NATO-nun kollektiv müdafiəni nəzərdə tutan 5-ci maddəsinin əhəmiyyətini ön plana çəkib. Bu maddənin 11 sentyabr hücumlarından sonra işə salındığını xatırladan nazir, Almaniyanın 20 il boyunca Əfqanıstanda ABŞ-ın yanında dayandığını vurğulayıb. O, NATO-dan ayrılmağın təkcə prezidentin qərarı ilə mümkün olmadığını, bunun üçün ən azı ABŞ Senatının razılığının tələb olunduğunu da diqqətə çatdırıb.
Ukrayna mövzusuna da toxunan Vadeful, Kiyevin Rusiyanın təcavüzünə qarşı müqavimətində ABŞ-ın hələ də mühüm rol oynadığını, lakin hazırda Almaniyanın Ukraynanın ən böyük və vacib dəstəkçisi olduğunu qeyd edib. O, Vaşinqtonun müttəfiqlikdən doğan bu gücü tərk etməsinin ABŞ-ın öz maraqlarına da xidmət etmədiyini əlavə edib. Berlinin bu bəyanatı Ağ Evin son aylarda artan "izolyasiya" meyllərinə qarşı Avropanın narahatlığının növbəti göstəricisidir.
