BAKI,VOA, Nailə Babazadə
İsrail hökuməti bazar ertəsi günü İtaliyanın ölkədəki səfirini Xarici İşlər Nazirliyinə çağıraraq rəsmi etirazını bildirib. Diplomatik gərginliyə səbəb İtaliyanın Xarici İşlər naziri Antonio Tayaninin Beyruta səfəri zamanı İsrailin hərbi fəaliyyətlərini sərt dildə tənqid etməsidir.
VOA xəbər verir ki, nazir Tayani Livan rəsmiləri ilə görüşü zamanı İsrailin mülki əhaliyə yönəlmiş hücumlarını "qəbulolunmaz" adlandırıb və İtaliyanın Livan xalqı ilə həmrəy olduğunu vurğulayıb. O, sosial şəbəkə hesabında paylaşım edərək Qəzzada baş verən humanitar fəlakətin Livanda təkrarlanmaması üçün tərəfləri dialoqa və dərhal atəşkəsə çağırıb.
Bu bəyanatlara paralel olaraq İsrail ordusu Livanın cənubunda həyata keçirdiyi genişmiqyaslı hava zərbələrinin nəticələrini açıqlayıb. Rəsmi məlumata görə, son bir həftədə "Hizbullah"ın 5 yüksək rütbəli komandiri və 250-dən çox döyüşçüsü məhv edilib.
Qeyd edək ki, iki ölkə arasındakı münasibətlər keçən həftədən etibarən gərginləşməyə başlayıb. Həmin vaxt İsrail ordusu Livanda xidmət edən İtaliya sülhməramlılarının karvanına xəbərdarlıq atəşi açmış və bu hadisə Romanın kəskin etirazı ilə nəticələnmişdi. Hazırda hər iki ölkə qarşılıqlı olaraq səfirləri geri çağıraraq izahat tələb edir.
