BAKI,VOA, Fərid Mikayılov

Avropa İttifaqında uzunmüddətli demoqrafik dəyişikliklər ciddi narahatlıq doğurur.

VOA xəbər verir ki, son proqnozlara əsasən, 2100-cü ilə qədər Avropa İttifaqının əhalisinin təxminən 12 faiz azalacağı gözlənilir.

Bu azalma ümumilikdə 53 milyon nəfər deməkdir və əhali sayının 452 milyondan 399 milyona düşməsi ilə nəticələnəcək.

Qeyd olunub ki, demoqrafik dəyişikliklər bütün ölkələr üzrə eyni deyil və bəzi dövlətlərdə əhali artımı müşahidə olunacağı halda, bir çox ölkələrdə ciddi azalma qeydə alınacaq.

Ən böyük azalma Baltikyanı ölkələrdə və Şərqi Avropada gözlənilir. Xüsusilə Latviya, Litva, Polşa və Yunanıstanda əhalinin 30 faizdən çox azalacağı proqnozlaşdırılır.

Məlumata əsasən, Bolqarıstan, Xorvatiya, Slovakiya, Rumıniya və İtaliya kimi ölkələrdə də əhali sayının 20 faizdən çox azalacağı gözlənilir.

Qeyd edilib ki, bəzi ölkələrdə isə əks proses müşahidə olunacaq. Lüksemburq, İslandiya və Malta kimi dövlətlərdə əhalinin 25 faizdən çox artacağı ehtimal edilir.

Demoqrafik dəyişikliklərin əsas səbəbləri aşağı doğum səviyyəsi və miqrasiya faktorudur.

Mütəxəssislər qeyd edir ki, əhali artımını təmin edən əsas amil məhz miqrasiyadır, çünki mövcud doğum səviyyəsi əhalinin sabit saxlanılması üçün kifayət etmir.

2100-cü ilə qədər Avropada əhalinin yaşlanması da sürətlənəcək və hər üç nəfərdən birinin 65 yaşdan yuxarı olması gözlənilir.

Bildirilib ki, bu proses əmək bazarına, sosial təminat sistemlərinə və iqtisadi inkişafa ciddi təsir göstərə bilər.