BAKI,VOA,Yusif Şərifzadə

Cənubi Livanda mart ayından bəri BMT sülhməramlıları atəş zolağı arasında qalıb və vəziyyət yenidən diqqət mərkəzindədir.

VOA xəbər verir ki, hazırda Fransa xüsusi nümayəndəsi Livanda rəsmi şəxslərlə UNİFİL qüvvələrinin və ölkədə ola biləcək digər müşahidə missiyalarının gələcəyi barədə danışır. UNİFİL-in mandatı 2026-cı ilin sonunda başa çatacaq və 2027-ci ildə tədricən geri çəkilmə gözlənilir. Əsas sual budur: UNİFİL çıxandan sonra Cənubi Livanda səlahiyyət boşluğu yaranacaqmı və Livan hökuməti həmin ərazilərə nəzarəti bərpa edib qeyri-dövlət aktorlarının və silahların qayıtmasının qarşısını ala biləcəkmi?

Fransa, İtaliya və İspaniya Livan ordusu ilə birgə Avropa ikitərəfli qüvvəsi çərçivəsində ərazilərə qoşun yerləşdirməyə hazır görünür, lakin detalları hələ müəyyən deyil. Livan hökuməti atəşkəs elanından sonra İsraillə növbəti addımlar barədə danışıq aparır. Bu addımlar arasında Hizbullahın silahsızlandırılması, üzvlərinin Litani çayının şimalına çəkilməsi və yüz minlərlə didərginin evlərinə qayıtması nəzərdə tutulur. Hazırda İsrail geri çəkilmədiyini bildirib və silahsızlandırma prosesi tamamlanana qədər didərginlərin qayıtmasına icazə verilmir.