BAKI,VOA,Yusif Şərifzadə
Katolik Kilsəsinin rəhbəri Papa XIV Leo ABŞ-ın müstəqilliyinin 250 illiyi münasibətilə etdiyi videomüraciətdə ölkənin immiqrantları qəbul etmək ənənəsini yüksək qiymətləndirib və amerikalıları Müstəqillik Bəyannaməsində əks olunan prinsiplərə sadiq qalmağa çağırıb.
VOA xəbər verir ki, Papa XIV Leo çıxışını Vatikan şəhərindən Filadelfiyadakı Milli Konstitusiya Mərkəzinə videobağlantı vasitəsilə edərək Azadlıq Medalı ilə təltif olunub.
Pontifik bildirib ki, "Amerika" adı dünyada azadlığın rəmzinə çevrilib və bunda ölkənin uzun illər immiqrantlara qucaq açmasının mühüm rolu olub.
O qeyd edib ki, ABŞ-ın müstəqilliyinin 250 illiyi ölkənin təməl prinsiplərinə yenidən nəzər salmaq və "azad insanların və cəsurların vətəni" idealına sadiqliyini qorumaq üçün mühüm fürsətdir.
Papa XIV Leo ümid etdiyini bildirib ki, ABŞ-ın qurucu atalarının irəli sürdüyü birlik, ədalət və sülh prinsipləri ölkənin gələcək inkişafına yol göstərəcək.
Pontifik çıxışında, həmçinin, dövləti insan həyatının mayalanma anından təbii ölümədək hüquqi müdafiəsini təmin edən qanunlar qəbul etməyə çağırıb.
O, heç bir ABŞ siyasətçisinin adını çəkməsə də, ölkədə uzunmüddətli problemlərin yalnız birlik və dəyişməz dəyərlər əsasında həll oluna biləcəyini vurğulayıb.
Papa XIV Leo daha əvvəl də miqrantlara qarşı sərt münasibətin gələcəkdə tarix tərəfindən mənfi qiymətləndiriləcəyini bildirmişdi.
