BMT komissiyası İsraildən Qəzza xəstəxanasının direktorunu azad etməyi tələb edib

BMT komissiyası İsraildən Kamal Ədvan Xəstəxanasının direktoru Hüssam Əbu Səfiyyənin dərhal azad edilməsini tələb edib. Komissiya bildirib ki, o, 19 aylıq saxlanma müddətində davamlı pis rəftara məruz qalıb və bu, beynəlxalq cinayət kimi qiymətləndirilə bilər. Bəyanatda digər fələstinli tibb işçilərinin də azad olunmasına çağırış edilib. Komissiya tibb işçilərinə qarşı hərbi əməliyyatların Qəzzanın səhiyyə sisteminin məhv edilməsinə yönəlmiş siyasətin bir hissəsi olduğunu bildirib. Eyni zamanda, İsraildən Hüssam Əbu Səfiyyəyə təcili və müstəqil tibbi yardım göstərilməsi istənilib. İsrail isə bu ittihamları əvvəllər rədd edərək silahlı qrupların xəstəxanalardan istifadə etdiyini iddia edib. Hüssam Əbu Səfiyyə 2024-cü ilin dekabrından etibarən ittiham irəli sürülmədən nəzarətdə saxlanılır

8 İyul 2026 19:24

BAKI,VOA,Yusif Şərifzadə

Birləşmiş Millətlər Təşkilatının komissiyası İsraildən Qəzzadakı Kamal Ədvan Xəstəxanasının direktoru Hüssam Əbu Səfiyyənin dərhal və qeyd-şərtsiz azad edilməsini tələb edib.

VOA xəbər verir ki, BMT-nin İşğal Altındakı Fələstin Əraziləri, o cümlədən Şərqi Qüds və İsraillə bağlı Müstəqil Beynəlxalq Araşdırma Komissiyası yaydığı bəyanatda Hüssam Əbu Səfiyyənin 2024-cü ilin dekabr ayından bəri İsrail tərəfindən saxlanıldığını bildirib. Komissiyanın qənaətinə görə, onun 19 aylıq həbs müddətində davamlı pis rəftara məruz qalması beynəlxalq hüquq baxımından cinayət hesab oluna biləcək əməllərə uyğun gəlir.

Komissiya, həmçinin əsassız şəkildə saxlanılan digər fələstinli tibb işçilərinin də azad edilməsinə çağırıb. Bəyanatda qeyd olunub ki, tibb işçilərinə qarşı hərbi əməliyyatlar Qəzzanın səhiyyə sisteminin sıradan çıxarılmasına yönəlmiş məqsədyönlü siyasətin tərkib hissəsi kimi qiymətləndirilib.

Sənəddə tibbi müəssisələrin və səhiyyə işçilərinin hədəfə alınmasının müharibə cinayəti, insanlığa qarşı cinayət və soyqırımı cinayəti kimi əvvəlki qiymətləndirmələrin bir daha təsdiqləndiyi vurğulanıb.

Komissiya İsraili Hüssam Əbu Səfiyyəyə təcili və müstəqil tibbi yardım göstərməyə çağırıb.

İsrail isə daha əvvəl tibb işçilərini və xəstəxanaları sistemli şəkildə hədəfə alması barədə ittihamları rədd edib və silahlı qrupların tibbi infrastrukturdan istifadə etdiyini iddia edib.

Hüssam Əbu Səfiyyə 2024-cü il dekabrın 27-də Beyt Lahiyadakı xəstəxanaya keçirilən əməliyyat zamanı saxlanılıb və o vaxtdan bəri ittiham irəli sürülmədən və məhkəmə qərarı olmadan nəzarətdə saxlanılır.