Avropa İttifaqı beş iranlı hakimə sanksiya tətbiq edib

Avropa İttifaqı beş iranlı hakimə və bir kiberqrup rəhbərinə sanksiya tətbiq edib. Onlar insan hüquqlarının pozulması və məlumatların məhdudlaşdırılmasına yardım göstərməkdə ittiham olunurlar. Sanksiya tətbiq edilən şəxslərdən birinin “Aşiyane” kiberqrupunun təsisçisi Nima Salehi olduğu açıqlanıb. Avropa İttifaqı bu qrupun İran Kiberməkan Polisi və İslam İnqilabı Keşikçiləri Korpusu ilə əməkdaşlıq etdiyini bildirir. Sanksiyaya məruz qalan hakimlərin adları açıqlanmayıb. Kaya Kallas İran daxilində təzyiqlərin artdığını bildirib. Avropa İttifaqının İranla bağlı sanksiya siyahısında hazırda 269 şəxs və 53 qurum var.

24 İyul 2026 18:46

BAKI,VOA,Yusif Şərifzadə

Avropa İttifaqı insan hüquqlarının pozulmasında ittiham olunan beş iranlı hakimə, həmçinin İran hökumətinə məlumatların qarşısının alınmasında kömək etdiyi bildirilən kiberqrupun aparıcı üzvünə qarşı sanksiyalar tətbiq edib.

VOA xəbər verir ki, Avropa İttifaqı Şurasının açıqlamasında “Aşiyane” kiberqrupunun iranlı təsisçisi Nima Salehinin sanksiyalar siyahısına daxil edildiyi bildirilib. Şura qeyd edib ki, bu qrup Avropa İttifaqının sanksiya siyahısında olan İran Kiberməkan Polisi və İslam İnqilabı Keşikçiləri Korpusu ilə sıx əməkdaşlıq edir.

Açıqlamada sanksiyaya məruz qalan beş hakimin adları göstərilməyib.

Avropa İttifaqının xarici siyasət və təhlükəsizlik məsələləri üzrə ali nümayəndəsi Kaya Kallas sosial şəbəkədə yaydığı bəyanatda bildirib ki, Tehran ölkə daxilində təzyiqləri gücləndirdikcə, ittifaq məsul şəxslərin cavabdehliyə cəlb edilməsi istiqamətində tədbirləri davam etdirəcək.

Yeni qərardan sonra Avropa İttifaqının İranla bağlı sanksiya siyahısına daxil etdiyi şəxslərin sayı 269-a, hüquqi şəxslərin və qurumların sayı isə 53-ə çatıb.