Roma Livan və İsrail arasında yeddinci danışıqlar raunduna ev sahibliyi edir

ABŞ-nin vasitəçiliyi ilə Romada Livan və İsrail arasında birbaşa danışıqların yeddinci raundu başlayıb. Tərəflər iyunda imzalanmış çərçivə sazişinin icrasını müzakirə edirlər. Saziş İsrail qoşunlarının Livan ərazilərindən mərhələli çıxarılmasını, Livan ordusunun həmin bölgələrə yerləşdirilməsini və silahlı qrupların tərksilahını nəzərdə tutur. Danışıqlar Livanın cənubunda gərginliyin davam etdiyi şəraitdə keçirilir. İsrail ordusunun bölgədə hərbi əməliyyatları və dağıntı işləri də davam edir.

4 Avqust 2026 18:16

BAKI,VOA,Yusif Şərifzadə

İtaliyanın paytaxtı Romada ABŞ-nin vasitəçiliyi ilə Livan və İsrail nümayəndə heyətləri arasında birbaşa danışıqların yeddinci raunduna start verilib.

VOA xəbər verir ki, bu barədə Livanın dövlət xəbər agentliyi NNA məlumat yayıb.

Bildirilib ki, danışıqlarda hər iki tərəfin nümayəndə heyətləri iştirak edir və əsas müzakirə mövzusu iyun ayında ABŞ-nin vasitəçiliyi ilə imzalanmış çərçivə sazişinin icrası ilə bağlı məsələlərdir.

İtaliyanın ANSA agentliyi və İsrail mətbuatı da danışıqların başladığını təsdiqləyib.

Xatırladaq ki, Roma iyunun 14-də altıncı danışıqlar raunduna ev sahibliyi etmişdi. Bundan əvvəl Vaşinqtonda keçirilən beş raundun nəticəsi olaraq iyunun 26-da tərəflər arasında çərçivə sazişi imzalanıb.

Saziş İsrail qoşunlarının işğal altında saxladığı bütün Livan ərazilərindən mərhələli şəkildə çıxarılmasını, bunun müqabilində isə Livan ordusunun həmin ərazilərdə yerləşdirilməsini və silahlı qrupların, o cümlədən "Hizbullah"ın tərksilah edilməsini nəzərdə tutur.

Danışıqlar Livanın cənub sərhədində gərginliyin davam etdiyi, İsrail ordusunun isə bölgədə evlərin və digər tikililərin sökülməsi, partlayışlar və ərazilərin təmizlənməsi əməliyyatlarını davam etdirdiyi bir vaxta təsadüf edir.