BAKI,VOA,Yusif Şərifzadə

Hörmüz boğazından keçən gəmilərin sayı kəskin azalıb və cümə günü boğazdan yalnız bir neçə gəminin keçdiyi müəyyən edilib. Gəmi hərəkətinin hazırkı səviyyəsi fevral ayında ABŞ və İsrailin İrana qarşı müharibəsi başlamazdan əvvəl qeydə alınan gündəlik göstəricidən dəfələrlə aşağıdır.

VOA xəbər verir ki, gəmi hərəkətini izləyən Kpler şirkətinin məlumatlarına əsasən, cümə günü Hörmüz boğazından iki gəmi keçib. Onlardan biri İranın ərazi sularına daxil olan taxıl daşıyan gəmi, digəri isə əks istiqamətdə hərəkət edən boş quru yük gəmisi olub.

Məlumatlara görə, boş mayeləşdirilmiş neft qazı daşıyan daha bir tanker də Hörmüz boğazından keçərək Fars körfəzinə doğru hərəkət edib. Cümə günü boğazdan xam neft daşıyan heç bir gəmi keçməyib.

Cümə axşamı Hörmüz boğazından doqquz gəmi keçib. Bu göstərici çərşənbə günü qeydə alınan beş gəmidən çox olsa da, avqust ayı üçün gündəlik orta göstərici olan 12 gəmidən aşağıdır.

Bəzi gəmilərin izləmə cihazlarını söndürərək müşahidədən yayınması səbəbindən faktiki keçidlərin sayı daha yüksək ola bilər. Bununla belə, mövcud göstəricilər müharibədən əvvəlki vəziyyətlə müqayisədə kəskin fərqlənir.

ABŞ və İsrailin İrana qarşı müharibəsi başlamazdan əvvəl Hörmüz boğazından gündəlik 130-dan çox gəmi keçirdi. Hazırkı göstəricilər isə beynəlxalq gəmiçilik fəaliyyətinin demək olar ki, dayanma həddinə çatdığını göstərir.

Yaxın Şərq üzrə baş analitik Torbyorn Solvedt bildirib ki, bölgənin enerji infrastrukturuna yönələn təhlükələrlə yanaşı, İranın Hörmüz boğazından keçən gəmiçiliyi məhdudlaşdırmaq imkanları danışıqlarda əsas təsir vasitəsidir.

Onun sözlərinə görə, İranın boğaz üzərində gəmiçilik imkanlarına təsiri Tehranla aparılan danışıqlarda ölkənin əsas üstünlüklərindən biri olaraq qalır.