ABŞ maliyyə naziri Skott Bessent qlobal neft bazarında təklif artıqlığı yarana biləcəyini və bunun nəticəsində xam neftin qiymətinin bir barel üçün 40-50 dollara qədər enə biləcəyini proqnozlaşdırıb.

ArabAZ xəbər verir ki, Skott Bessent “War Room” podkastında çıxışı zamanı neft bazarında yaxın dövrdə artıq təklif formalaşa biləcəyini bildirib.

O, qlobal bazarda neft bolluğunun qiymətləri aşağı sala biləcəyini qeyd edərək, xam neftin qiymətinin 40-50 dollar aralığına düşə biləcəyini deyib.

ABŞ maliyyə naziri, həmçinin Donald Tramp administrasiyasının İranla ticarət əlaqələrini davam etdirən banklara qarşı yeni sanksiyalar tətbiq etdiyini açıqlayıb.

Bessent bildirib ki, ABŞ İranla əlaqəli maliyyə qurumlarına qarşı tədbirləri genişləndirir və daha çox bankın sanksiya siyahısına daxil edilə biləcəyini istisna etməyib.

Onun sözlərinə görə, ABŞ ötən həftə İran hökumətinə maliyyə dəstəyi göstərdiyini iddia etdiyi Misirin bir bankına və onun Dubaydakı beş filialına qarşı tədbir görüb.

Bessent əlavə edib ki, Vaşinqton İranla əlaqəli hesab etdiyi maliyyə şəbəkələrini izləməyə davam edir.