Özbəkistan və İordaniya arasında vizasız gediş-gəliş başlayır

Qərar bu il 26 avqustda Səmərqənddə keçirilən görüşdə imzalanmış razılaşmanın nəticəsidir. Həmin görüşdə Özbəkistan Prezidenti Şavkat Mirziyoyev ilə İordaniya kralı II Abdullah ibn əl-Hüseyn bir sıra sənədlərə, o cümlədən vizanın ləğvini nəzərdə tutan sazişə imza atıblar.

29 Avqust 2025 13:45

BAKI, AzerVoice, Fərid Mikayılov

Özbəkistan vətəndaşları 25 sentyabrdan etibarən İordaniyaya vizasız səfər edə biləcəklər.

AzerVoice xəbər verir ki, Özbəkistan Xarici İşlər Nazirliyinin məlumatına görə, yeni qaydalara əsasən, vətəndaşlar vizasız şəkildə 30 gün müddətinə İordaniyada qala biləcəklər.

Razılaşmaya görə, eyni hüquq İordaniya vətəndaşlarına da şamil ediləcək. Onlar da 25 sentyabrdan etibarən Özbəkistana vizasız səyahət edə biləcəklər.

Qeyd edək ki, indiyədək özbəkistanlılar İordaniyaya gedərkən hava limanında viza (visa on arrival) alırdılar. Yeni qərarla İordaniya, Özbəkistan vətəndaşlarının vizasız daxil ola biləcəyi 35-ci ölkə oldu.