BAKI,VOA,Yusif Şərifzadə
Pakistan və Küveyt cümə axşamı iki ölkə arasında hərbi əməkdaşlığın genişləndirilməsini nəzərdə tutan yeni müdafiə sazişi imzalayıblar. Pakistan Müdafiə Nazirliyinin məlumatına görə, sənəd 2023-cü ildən mövcud olan hərbi əməkdaşlıq çərçivəsini əhəmiyyətli dərəcədə genişləndirir.
VOA xəbər verir ki, “Protokol Sazişi-2026” adlanan sənədi Pakistanın müdafiə naziri Xavaca Asif və Küveytin müdafiə naziri Şeyx Abdullah Əli Abdullah əs-Salim əs-Sabah Ravalpindidə imzalayıblar.
Razılaşmaya əsasən, Pakistan Silahlı Qüvvələri Küveyt hərbçilərinin hazırlanmasına kömək edəcək. İslamabad həmçinin Küveytin müdafiə imkanlarının gücləndirilməsi və sərhədlərin idarə olunması sahəsində dəstək göstərəcək.
Pakistan Müdafiə Nazirliyi yeni sənədin iki ölkə arasında hərbi əməkdaşlığın daha da genişləndirilməsinə imkan yaradacağını bildirib. Razılaşma müdafiə sahəsində mövcud əlaqələrin daha sistemli şəkildə inkişaf etdirilməsini nəzərdə tutur.
Yeni sənəd əslində 2023-cü ilin iyununda Pakistan və Küveyt arasında imzalanmış əsas razılaşmanın davamıdır. Həmin razılaşma Küveyt tərəfindən yalnız ötən ay rəsmi şəkildə təsdiqlənib.
Küveytlə əldə olunan razılaşma Körfəz ölkələrinin Pakistanla müdafiə əlaqələrini gücləndirdiyi bir dövrə təsadüf edir. Pakistan bölgə dövlətlərinə hərbi təlim, müdafiə imkanlarının artırılması və sərhəd təhlükəsizliyi sahələrində dəstək verməyə çalışır.
Bununla belə, Küveytlə yeni sazişdən Pakistanın konkret olaraq hansı iqtisadi, maliyyə və ya strateji üstünlüklər əldə edəcəyi barədə açıqlanan məlumatlarda ətraflı göstəricilər yer almır.
