BAKI,VOA,Yusif Şərifzadə
İşğal altındakı İordan çayının qərb sahilinin Nablus şəhərində İsrail buldozerlərinin fələstinlilərə məxsus evləri dağıtmağa davam etdiyi bildirilir. Dağıntılar nəticəsində bir neçə ailənin yaşayış yeri olmadan qaldığı açıqlanıb.
VOA xəbər verir ki, Nablus şəhərinin şimalında iki yaşayış binası, ümumilikdə altı mənzilin dağıdıldığı bildirilib. İsrail tərəfi həmin evlərin icazəsiz tikildiyini və ərazinin ilin əvvəlindən İsrail qüvvələrinin nəzarətində olduğunu iddia edib.
BMT-nin Humanitar Məsələlərin Əlaqələndirilməsi üzrə Komissiyasının məlumatına görə, işğal altındakı İordan çayının qərb sahilində İsrail qüvvələri tərəfindən 870-dən çox kommersiya, sənaye və yaşayış binası dağıdılıb.
Məlumata əsasən, davam edən söküntü siyasəti nəticəsində 534-dən çox fələstinli uşağın məcburi köçkün vəziyyətinə düşdüyü bildirilir.
Evlərindən çıxarılan fələstinli ailələr gedəcək yerlərinin olmadığını deyirlər. Onların sözlərinə görə, yaşayış yerlərini tərk etdikdən sonra yeganə seçim kirayə mənzil tutmaqdır.
Lakin İordan çayının qərb sahilində ağırlaşan iqtisadi vəziyyət səbəbindən bir çox ailə kirayə xərclərini ödəyə bilmir. Bu səbəbdən bəzi ailələrin öz dağıdılmış evlərinin xarabalıqları üzərində çadırlarda yaşamaq məcburiyyətində qala biləcəyi bildirilir.
Fələstinli ailələr bu vəziyyəti məcburi köçürmə siyasəti kimi qiymətləndirirlər. Onların sözlərinə görə, evlərin dağıdılması bölgədə humanitar vəziyyəti daha da ağırlaşdırır.
