Bakı. AzerVoice:

Azərbaycanda keçirilən prezident seçkilərində nə qədər insanın səs verməyə gəlməsi bizi heyrətə gətirir.

Bu sözləri AzerVoice-ə çərşənbə günü ATƏT PA missiyasının rəhbəri Daniela de Ridder Azərbaycan Dillər Universitetində təşkil olunmuş 23 saylı seçki dairəsinin 26 saylı seçki məntəqəsində jurnalistlərə deyib.

"Bu gün biz digər parlamentarilərlə birlikdə seçkinin başlanmasını diqqətlə izləyirik. Biz seçicilərin səsvermədə fəal iştirakını qeyd edirik və prosesi gün ərzində davam etdirmək niyyətindəyik. İndiyə qədər hər şey rəvan gedirdi. Bəzi seçki məntəqələrinin onsuz da izdihamlı olmasına heyran qaldıq” , o vurğulayıb.

Qeyd edək ki, bu gün Azərbaycanda Prezident seçkiləri keçirilir. Prezident seçkilərində 7 nəfərin namizədliyi qeydə alınıb. Onlardan 5 nəfərin namizədliyi siyasi partiyalar tərəfindən, 2 nəfərin namizədliyi öz təşəbbüsü ilə irəli sürülüb. Yanvarın 9-da prezidentliyə namizədliyin qeydə alınması başa çatıb.

Seçici siyahılarında 6 milyon 478 min 623 seçicinin adı var. Onlar ölkə üzrə 6537 məntəqədə səs verəcəklər.

Seçkiləri izləmək üçün indiyə qədər 90 372 müşahidəçi qeydə alınıb. Onların 790 nəfəri 72 beynəlxalq təşkilatı təmsil edən müşahidəçilərdir. Bu müşahidəçilər 89 ölkədəndir.

Seçkilər bütün Azərbaycan ərazisini, o cümlədən, işğaldan azad edilmiş əraziləri əhatə edir. İşğaldan azad edilən ərazilərdə 26 seçki məntəqəsi yaradılıb.

Xaricdə olan Azərbaycan vətəndaşları üçün 37 ölkədə səfirlik və konsulluqlarda 49 seçki məntəqəsi yaradılıb. Həmin məntəqələrdə 23 mindən artıq seçici səsvermə hüququndan istifadə edəcək.

Seçkilərdə 190 beynəlxalq media qurumu iştirak edir. Onların 216 təmsilçisi beynəlxalq müşahidəçi kimi qeydə alınıb.

Səsvermə günü adı seçici siyahısında olan, amma məntəqələrə gəlmək imkanı olmayan seçicilərə Seçki Məcəlləsinin tələbinə görə daşınan qutu çatdırılacaq.