Bakı. AzerVoice:

Azərbaycan hökumətini növbədənkənar Prezident seçkilərində yüksək seçici fəallığı və bu seçkilərin əla keçirilməsi münasibətilə təbrik edirəm.

AzerVoice-in məlumatına görə, bunu Asiya Parlament Assambleyasının baş katibi Məhəmməd Rza Məcidi Bakıda mətbuat konfransı zamanı deyib.

"Mən və nümayəndə heyətim beynəlxalq müşahidəçi kimi seçkilərdə iştirak etməkdən çox məmnunuq. Nümayəndə heyətimizə Asiya Parlament Assambleyası sədrinin, eləcə də, Türkiyə parlamentinin nümayəndələri daxildir. Həqiqətən də, seçkilərdə seçicilərin fəal iştirakının şahidi olduq”, - deyə o qeyd edib.

Xatırladaq ki, ötən gün Azərbaycanda Prezident seçkiləri keçirilib. Prezident seçkilərində 7 nəfərin namizədliyi qeydə alınıb. Onlardan 5 nəfərin namizədliyi siyasi partiyalar tərəfindən, 2 nəfərin namizədliyi öz təşəbbüsü ilə irəli sürülüb.

Seçki məntəqələrinin 93,35 faizindən daxil olan məlumatlar əsasında prezident seçkilərinin ilkin nəticələrinə əsasən Yeni Azərbaycan Partiyasının prezidentliyə namizədi İlham Əliyev 92,05 faiz səslə liderdir.

Namizədliyi özü tərəfindən irəli sürülən Zahid Oruc səslərin 2,19 %, Milli Cəbhə Partiyasının prezidentliyə namizədi Razi Nurullayev 0,8% , Böyük Quruluş Partiyasının prezidentliyə namizədi Fazil Mustafa 2 % Böyük Azərbaycan Partiyasının prezidentliyə namizədi Elşad Musayev 0,67%, Bütöv Azərbaycan Xalq Cəbhəsi Partiyasının prezidentliyə namizədi Qüdrət Həsənquliyev 1,76% və namizədliyi özü tərəfindən irəli sürülən Fuad Əliyev isə səslərin 0,53 % toplayıb.