BAKI,AzerVoice Azərbaycan İslam Ensiklopediyası
Süheyb Rumi İslam tarixində tanınmış səhabələrdən biri kimi yadda qalıb. O, əsli ərəb olan Bəni Nümeyr qəbiləsinə mənsub idi. Uşaqlıq illərini İraqda keçirən Süheybin taleyi İran–Bizans müharibələri dövründə dəyişib. Müharibə zamanı bizanslılara əsir düşən Süheyb uzun müddət köləlik həyatı yaşayıb. Məhz bu səbəbdən o, yunan dilini ərəb dilindən daha yaxşı bilirdi və “Rumi” ləqəbi ilə tanınıb.
Uzun illər sonra köləlikdən azad edilən Süheyb Məkkəyə qayıdıb. O, İslamı qəbul edən ilk şəxslərdən biri olub. Məhəmməd peyğəmbərin peyğəmbərliyi barədə eşidən kimi Ərqəmin evinə gedərək İslamı qəbul edib. Bu seçim ona ağır bədəllər bahasına başa gəlib. Qüreyşlilər tərəfindən ciddi təzyiq və işgəncələrə məruz qalan Süheyb Məkkəli olmadığı üçün heç bir tayfa və ya ailə tərəfindən qorunmayıb.
Mədinəyə hicrət zamanı Qüreyşlilər onun şəhəri tərk etməsinə mane olublar. Süheyb canını xilas etmək üçün bütün mal-dövlətini Məkkədə qoyaraq gizli şəkildə yola çıxıb. Üstəlik, yol boyu da qarətə məruz qalıb. Buna baxmayaraq, o, Mədinəyə çataraq müsəlman icmasına qoşulub və icmanın möhkəmlənməsi üçün fəal şəkildə çalışıb, bir sıra döyüşlərdə iştirak edib.
Peyğəmbərin vəfatından sonra Süheyb ilk xəlifələri dəstəkləyib. Xəlifə Ömərin vəfatından sonra isə onun vəsiyyətinə əsasən, üç gün ərzində Mədinə məscidində camaata namaz qıldırıb.
Süheyb Rumi təxminən 70 yaşında Mədinədə vəfat edib və İslam tarixində sədaqəti, fədakarlığı və səbrli həyatı ilə nümunəvi səhabələrdən biri kimi xatırlanır.
