BAKI,AzerVoice
Livan Prezidenti Cozef Aun bu gün (bazar ertəsi) Beyrutdakı Rafiq Həriri Beynəlxalq Hava Limanından Səudiyyə Ərəbistanının paytaxtı Ər-Riyada yola düşüb. Səfər, Səudiyyə Ərəbistanının vəliəhdi və Baş naziri Məhəmməd bin Salmanın dəvəti əsasında həyata keçirilir.
Prezident Aun, vəzifəyə gəldikdən sonra ilk xarici səfərində Livanın xarici işlər və mühacirlər naziri Yusif Raci tərəfindən müşayiət olunur. Onlara Ər-Riyadda Livanın Səudiyyə Ərəbistanındakı səfiri Dr. Fauzi Kabbara da qoşulacaq.
Andiçmə nitqində Aun, Livanın "müsbət neytrallıq siyasətini" qəbul edəcəyini və regiondakı bloklaşmalardan uzaq duraraq "Livanın ərəb kimliyini əsas götürərək qardaş ərəb dövlətləri ilə ən yaxşı münasibətləri quracağını" vəd etmişdi.
Prezident seçildikdən sonra Aun
bildirib:
"Səudiyyə Ərəbistanı artıq
təkcə region üçün deyil, bütün dünya üçün bir qapıya çevrilib. O,
qlobal sülhün platformasına çevrildi. Məhz buna görə mən ilk
səfərim üçün tarixi əlaqələrimizə görə Səudiyyəni seçdim. Ümid
edirəm ki, xüsusilə vəliəhd şahzadə Məhəmməd bin Salmanın dəstəyi
ilə iki ölkə arasında münasibətləri normallaşdıraraq bütün
maneələri aradan qaldıra bilərik. Səudiyyəlilər Livanı ikinci
vətənləri kimi görür, livanlılar da Səudiyyəni çox
darıxıblar".
O əlavə edib ki, "Livan, Səudiyyə vəliəhdinin 'Səudiyyə 2030' vizyonuna uyğun olaraq müəyyən sahələrdə əməkdaşlıq edə bilər. Bu istiqamətdə təhlükəsizlik, hərbi, iqtisadi, turizm, ticarət və maliyyə sahələrində əməkdaşlığı izləyəcək ikitərəfli komitələr yaradılmalıdır".
Aun 9 yanvar tarixində ölkənin prezidenti seçilib. Onun prezidentliyi ölkədaxili güc balansının dəyişdiyi bir dövrə təsadüf edir. Çünki son vaxtlar "Hizbullah" İsraillə qarşıdurmadan zəifləyərək çıxıb və Livandakı siyasi dominantlığını itirib. Bundan əlavə, onun əsas müttəfiqi olan Bəşər Əsəd rejimi Suriyada ciddi itkilərə məruz qalıb.
