BAKI, AzerVoice

İranla İsrail arasında müharibə Səudiyyə Ərəbistanında minlərlə zəvvarın çıxışına əngəl olub.

AzerVoice xəbər verir ki, İran və İsrail arasında davam edən gərginlik səbəbindən Həcc ziyarəti üçün Səudiyyə Ərəbistanına gələn 12 min 500-ə yaxın iranlı zəvvar ölkədə qapalı vəziyyətdə qalıb.

Gərginliyin artması fonunda bölgədə mülki hava uçuşlarının məhdudlaşdırılması bu vəziyyəti daha da çətinləşdirib.

İran mətbuatı bildirir ki, zəvvarların Şərq vilayətlərindən qonşu ölkələrin hava limanları vasitəsilə geri qaytarılması planlaşdırılsa da, bu imkanlar reallaşmayıb. İran rəsmiləri hazırda zəvvarların quru sərhədlərlə, xüsusilə İraq üzərindən vətənə dönə bilməsi üçün Səudiyyə Ərəbistanı və İraqla koordinasiyanı davam etdirirlər.

Səudiyyə rəsmiləri isə bəyan ediblər ki, iranlı zəvvarların ehtiyacları qarşılanır və vətənlərinə təhlükəsiz qayıda bilmələri üçün bütün lazımi şərait yaradılacaq. Hazırda Mədinədə olan zəvvarların geri dönüşü ilə bağlı proseslər davam etdirilir.

Qeyd edək ki, İsrailin İrana qarşı hərbi əməliyyatları fonunda bölgədəki hava nəqliyyatı ciddi şəkildə pozulub. Bu hal yalnız zəvvarların deyil, eyni zamanda bölgədəki digər sivil nəqliyyat zəncirlərinə də təsir göstərir.