Səudiyyə Ərəbistanının Dammam şəhərində yerləşən Kral Fəhd Beynəlxalq Hava Limanında gömrük əməkdaşları bağlamanın içərisində gizlədilmiş 18 549 ədəd amfetamin həbinin ölkəyə keçirilməsinin qarşısını alıblar.
ArabAZ xəbər verir ki, Zəkat, Vergi və Gömrük İdarəsinin sözçüsü Həmud əl-Hərbi bildirib ki, narkotik vasitələr bağlamanın gömrük rəsmiləşdirilməsi zamanı aparılan yoxlama nəticəsində aşkarlanıb. Narkotiklərin müəyyənləşdirilməsi üçün müasir təhlükəsizlik sistemlərindən və xüsusi təlim keçmiş itlərdən istifadə olunub.
Müsadirədən sonra Zəkat, Vergi və Gömrük İdarəsi Səudiyyə Ərəbistanının Narkotiklərlə Mübarizə Baş İdarəsi ilə koordinasiyalı şəkildə əməliyyat keçirib. Araşdırma nəticəsində narkotik vasitələrin ölkə daxilində nəzərdə tutulan alıcılarının kimliyi müəyyənləşdirilib və 4 şübhəli şəxs saxlanılıb.
Əl-Hərbi qeyd edib ki, qurum ölkənin bütün sərhəd-keçid məntəqələrində təhlükəsizlik tədbirlərini gücləndirməyə və müxtəlif növ qaçaqmalçılığın qarşısını almağa davam edir. Bu istiqamətdə Daxili İşlər Nazirliyi və digər təhlükəsizlik qurumları ilə əməkdaşlıq həyata keçirilir.
Qurum həmçinin vətəndaşları qaçaqmalçılıqla bağlı məlumat verməyə çağırıb. Bildirilib ki, təsdiqlənmiş məlumatlara görə maliyyə mükafatı təqdim olunur.
