Səudiyyə Ərəbistanının sabitliyinin əsas dayaqları kimi təhlükəsizlik, enerji təchizatının davamlılığı, müstəqil qərarvermə və balanslaşdırılmış beynəlxalq tərəfdaşlıqlar göstərilib.
ArabAZ xəbər verir ki,bu fikirlər Ər-Riyadda keçirilən “Security and History Dialogue 2026” konfransında panel müzakirəsi zamanı səsləndirilib. Siyasi və iqtisadi ekspertlər bildiriblər ki, təhlükəsizlik sahəsində əməkdaşlıqlar müharibələrin qarşısının alınmasına, daxili sabitlik isə enerji infrastrukturunun və ölkənin qlobal enerji bazarındakı rolunun qorunmasına imkan verir.
Səudiyyəli jurnalist qəzetinin köşə yazarı Əbdürrəhman Ər-Raşid bildirib ki, regional müharibələrin qarşısını almaq üçün güclü ittifaqlara ehtiyac var. Onun sözlərinə görə, Körfəz Əməkdaşlıq Şurasının yaradılması region ölkələrinin təhlükəsizlik çağırışlarına birgə cavab vermək səylərinin nümunələrindən biridir.
Ər-Raşid Səudiyyə Ərəbistanı, Pakistan və Türkiyə arasında formalaşan əməkdaşlığı da qeyd edib. O bildirib ki, bu tərəfdaşlıq yalnız İrana qarşı yönəlməyib, daha geniş şəkildə üç ölkənin xarici hücumlardan qorunmasına xidmət edir. Onun sözlərinə görə, Səudiyyə Ərəbistanı ilə Pakistan arasında uzunmüddətli hərbi əlaqələr mövcuddur, Türkiyə ilə müdafiə əməkdaşlığı isə son illərdə genişlənib.
Enerji məsələləri üzrə məsləhətçi İbrahim Əl-Mühənna enerji təhlükəsizliyi və sabitliyinin iqtisadi artım, daxili sabitlik və vətəndaşların rifahı üçün mühüm əhəmiyyət daşıdığını bildirib. Onun sözlərinə görə, Səudiyyə Ərəbistanı dünyanın ən böyük neft istehsalçıları və ixracatçıları sırasında olmaqla yanaşı, digər mənbələrdə yaranan təchizat çatışmazlığını kompensasiya etməyə imkan verən ehtiyat hasilat gücünə malik azsaylı ölkələrdəndir.
Əl-Mühənna qeyd edib ki, ölkə daxilində təhlükəsizlik və sabitliyin qorunması Səudiyyə Ərəbistanının neft sənayesindəki rolunun və qlobal bazarları enerji ilə təmin etmək imkanlarının davamlılığı üçün vacibdir. O, İran-İraq müharibəsi dövründə 1980-ci illərdə baş verən tanker müharibəsini xatırladaraq, həmin dövrdən sonra Səudiyyə Ərəbistanının neftin Körfəzdən Qırmızı dənizə daşınması imkanlarını nəzərdən keçirdiyini bildirib.
Bu çərçivədə yaradılan Şərq-Qərb neft kəməri hazırda gündə təxminən 7 milyon barel neft daşıyır və Qırmızı dəniz sahilində yerləşən emal müəssisələrini təmin edir. Kəmər Körfəzdən ixracın pozulduğu hallarda alternativ marşrut rolunu oynayır.
Körfəz Araşdırmaları Mərkəzinin rəhbəri Əbdüləziz Saqer isə Səudiyyə Ərəbistanının rəqabət aparan qlobal güclərlə münasibətlərini balanslaşdırmaq imkanını vurğulayıb. O, Krallığın Rusiya-Ukrayna müharibəsi ilə bağlı mövqeyini buna nümunə göstərərək, Səudiyyə Ərəbistanının Rusiyaya qarşı səs verdiyini və Ukraynaya humanitar yardım göstərdiyini, eyni zamanda Moskva ilə münasibətlərini qoruduğunu bildirib.
Saqerin sözlərinə görə, Səudiyyə Ərəbistanı üçün tərəfdaşlıq müstəqillik və suverenlikdən imtina demək deyil. Əksinə, balanslı əməkdaşlıq ölkənin beynəlxalq münasibətlərini genişləndirməsinə və milli maraqlarını qorumasına imkan verir.
Beynəlxalq münasibətlər üzrə tədqiqatçı Cozef Keçişyan Səudiyyə Ərəbistanının xarici siyasətini ardıcıl və gələcəyə yönəlmiş siyasət kimi qiymətləndirib. O bildirib ki, Krallığın strateji tərəfdaşlıqları ABŞ və Böyük Britaniya ilə ənənəvi təhlükəsizlik əlaqələri ilə məhdudlaşmır, Çin, Rusiya və Qlobal Cənub ölkələri ilə münasibətləri də əhatə edir.
Ekspertlərin fikrincə, bu yanaşma Səudiyyə Ərəbistanının regional sabitliyi qorumaq və iqtisadi transformasiyanı dəstəkləmək məqsədlərinə xidmət edir.
