Bakı. AzerVoice :
Məlum olduğu kimi, ali təhsil müəssisələrində (ATM) müvafiq ixtisaslaşmalar üzrə tədris aparılan SABAH qruplarına (siyahı) daha hazırlıqlı tələbələrin qəbulunu təmin etmək məqsədilə həmin ixtisaslaşmaları seçmək istəyən bakalavrların ixtisas seçimi ərizələrini doldurmamışdan öncə 7 – 14 iyun 2024-cü il tarixlərində müvafiq ATM-lərdə yaradılan komissiyada müsahibədən keçmələri tələb olunur.
Bu barədə AzerVoice-ə DİM-dən bildirilib.
Müsahibədə iştirak etmək üçün Dövlət İmtahan Mərkəzinin internet səhifəsində tələbələrin qeydiyyatı aparılır. Qeydiyyat linki (https://eservices.dim.gov.az/ERIZEMAG/qeydiyyatsabah/) 6 – 14 iyun (saat 12:00-dək) tarixlərində aktiv olacaq.
Qeydiyyatdan keçmiş bakalavrlar müvafiq ATM-in təyin etdiyi qrafiklə müsahibəyə dəvət olunurlar. Bunun üçün ATM-in nümayəndəsi tərəfindən bakalavrın magistraturaya qəbul imtahanında iştirak etmək üçün verdiyi ərizəsində göstərdiyi əlaqə nömrəsinə zəng olunur.
