Rusiyaya məxsus dörd gəmidən ibarət təchizat karvanı Moskva ilə Dəməşq arasında avqustda imzalanmış razılaşmadan sonra ilk dəfə Suriyanın Tartus limanına çatıb.
ArabAZ xəbər verir ki, sentyabrın 7-də limana daxil olan karvan Rusiyanın Tartusdakı obyektləri və Hmeymim hava bazasını yeni razılaşma çərçivəsində təchiz etməyə davam etdiyini göstərir.
Suriya Xarici İşlər Nazirliyinin məlumatına görə, razılaşma Tartus və Hmeymimdəki obyektlərin birgə təlim və imkanların inkişafı mərkəzlərinə çevrilməsini nəzərdə tutur. Mülki fəaliyyətə nəzarət isə Suriya tərəfinə veriləcək.
Peyk görüntülərində “Sparta” yük gəmisinin Tartus limanında “Akademik Paşin” hərbi yardım gəmisi ilə yanaşı dayandığı görünür. “General Skobelev” yanacaqdaşıyan gəmisi isə sahildən kənarda qalıb. Rusiyanın Suriyadakı hərbi təchizatında uzun müddətdir istifadə olunan “Sparta” və “General Skobelev” Qərbin sanksiyaları altındadır.
Rusiya Prezidenti Vladimir Putin və Suriya Prezidenti Əhməd əş-Şaraa hərbi obyektlərin gələcək fəaliyyəti ilə bağlı danışıqları davam etdirirlər.
Rusiya Bəşər Əsəd hakimiyyətini dəstəkləmək üçün Suriyadakı vətəndaş müharibəsinə hərbi müdaxilə etmişdi. Əsədin 2024-cü ildə hakimiyyətdən uzaqlaşdırılmasından sonra Moskvanın bölgədəki təsiri əhəmiyyətli dərəcədə zəifləyib.
Moskva keçmiş Sovet İttifaqı ərazisindən kənardakı yeganə iki hərbi obyektini qorumaq üçün Suriyanın yeni rəhbərliyi ilə əlaqələri bərpa etməyə çalışır. Dəməşq isə hazırda Moskvada yaşayan Bəşər Əsədin Suriyaya təhvil verilməsini tələb edir.
