Körfəz ölkələri strateji obyektlərdə təhlükəsizlik tədbirlərini gücləndirir

Körfəz ölkələri artan regional gərginlik fonunda təhlükəsizlik tədbirlərini gücləndirirlər. Strateji əhəmiyyətli obyektlər, o cümlədən neft və qaz müəssisələri, hava limanları və dəniz suyunun şirinləşdirilməsi qurğuları xüsusi mühafizəyə götürülüb. Hava hücumundan müdafiə sistemləri gücləndirilir, orduların döyüş hazırlığı artırılır. Bəhreyn İran istiqamətindən buraxıldığı bildirilən çoxsaylı pilotsuz uçuş aparatını və raketi zərərsizləşdirdiyini açıqlayıb. Ekspertlər genişmiqyaslı münaqişənin strateji infrastruktura zərər vura biləcəyini bildirirlər. Onların fikrincə, belə bir ssenari regional təhlükəsizlik və dünya iqtisadiyyatı üçün ciddi risk yaradar. Buna görə də bölgə ölkələri qarşıdurmanın diplomatik yolla həllinə üstünlük verirlər. Dialoqun təşviqi hazırda Körfəz dövlətlərinin əsas prioritetlərindən biri hesab olunur.