BAKI,VOA

İngiltərə və Uelsdə məhkəmə binalarına “Meta” şirkətinin kamera ilə təchiz edilmiş ağıllı eynəkləri ilə giriş qadağan edilib.

VOA xəbər verir ki, İngiltərə və Uelsdə cinayət, mülki və ailə məhkəmələrinə cavabdeh olan Kral Məhkəmələri və Tribunal Xidməti məhkəmə binalarına “Meta” eynəkləri ilə daxil olmaq istəyən şəxslərin eynəklərinin giriş zamanı götürüləcəyini açıqlayıb.

Qurumun sözçüsü bildirib ki, məhkəmə və məhkəmə-hüquq müəssisələrində görüntü və video çəkilişlərinə dair ciddi məhdudiyyətlər mövcuddur. Bu səbəbdən kameraya malik “Meta” eynəklərinin istifadəsinə icazə verilmir.

Qeyd olunub ki, belə eynəklərlə məhkəmə binasına gələn şəxslərin cihazları girişdə müvəqqəti olaraq götürüləcək və binadan çıxarkən sahibinə qaytarılacaq.

İngiltərədə məhkəmə binalarında rəsmi icazə olmadan foto və video çəkilişləri qadağandır. Bu qaydanın pozulması məhkəməyə hörmətsizlik kimi qiymətləndirilə və hüquqi məsuliyyətə səbəb ola bilər.

“Meta” eynəkləri niyə mübahisə yaradır?

“Meta” tərəfindən istehsal olunan ağıllı eynəklər istifadəçiyə video çəkməyə imkan verən kamera ilə təchiz olunub.

Bu xüsusiyyət şəxslərin icazəsi olmadan görüntülərinin qeydə alınması, şəxsi həyatın toxunulmazlığının pozulması və çəkilişlərin “Facebook” və “Instagram” kimi platformalarda canlı yayımlanması ilə bağlı narahatlıqlara səbəb olub.

İngiltərə və Uelsdə qəbul edilən qərar ABŞ-ın Nyu-York ştatındakı məhkəmələrin ötən ay oxşar qadağa tətbiq etməsindən sonra gündəmə gəlib.