BAKI, VOA
Səudiyyə Ərəbistanı Daxili İşlər Nazirliyi "LEAP 2026" beynəlxalq texnologiya konfransında süni intellekt, məlumat bazaları və rəqəmsal həllərə əsaslanan inteqrasiya olunmuş təhlükəsizlik modelini təqdim edib.
ArabAZ xəbər verir ki, qurum sərgidə sahə təhlükəsizliyi, operativ müdaxilə, yol hərəkəti təhlükəsizliyi, müşahidə kameraları, vətəndaşlar üçün rəqəmsal xidmətlər və institusional idarəetməni əhatə edən 6 sistem üzrə ümumilikdə 36 layihə və xidmət nümayiş etdirir.
Nazir müavini Thamer əl-Hərbi bildirib ki, Milli İnformasiya Mərkəzi ilə birgə hazırlanan "Nafath" rəqəmsal şəxsiyyət vəsiqəsi platforması 1245 sistem vasitəsilə 32 milyondan çox istifadəçiyə xidmət göstərərək 6,5 milyarddan artıq əməliyyat icra edib.
Eyni zamanda təqdim edilən "Maidan Companion" və 96 faizlik tamamlama dərəcəsinə malik "Absher Companion" innovasiyaları təhlükəsizlik qüvvələrinin operativliyini artırmaqla yanaşı, vətəndaşlara göstərilən dövlət xidmətlərini daha da sürətləndirir.
