BAKI, AzerVoice
Türkiyə Xarici İşlər Nazirliyi, İsrailin Qəzzaya humanitar yardım aparan “Madleen” yelkənlisində saxladığı 12 fəalın dünən axşam sahilə çıxdığını bildirib.
AzerVoice xəbər verir ki, nazirlik mənbələrinin verdiyi məlumata görə, Tel-Əvivdəki səfirlik rəsmiləri bu səhər saatlarında Türkiyə vətəndaşları ilə görüşüblər.
Nazirlik rəsmiləri fəalların yaxınlarına mütəmadi olaraq vəziyyətlə bağlı məlumat verildiyini və onlara bütün konsulluq dəstəyinin göstərildiyini qeyd ediblər.
Qeyd edək ki, “Azadlıq Donanması Koalisiyası (Freedom Flotilla Coalition)” adlı vətəndaş cəmiyyəti təşkilatının Qəzzaya tətbiq olunan blokadanı yararaq bölgəyə yardım çatdırmaq məqsədilə həyata keçirdiyi son missiya çərçivəsində 18 metrlik gəmi 1 iyun tarixində İtaliyanın Kataniya şəhərindəki San Covanni Li Kuti Limanından Qəzzaya doğru yola çıxmışdı.
“Madleen” gəmisindəki aktivistlər, İsrail ordusunun müdaxiləsi halında sülhsevər mövqe tutacaqlarını və müqavimət göstərməyəcəklərini əvvəlcədən bəyan etmişdilər.
İsrail ordusu Qəzzaya tətbiq olunan blokadanı pozmaq məqsədi daşıyan “Madleen” gəmisinə müdaxilə etmişdi.
Gəmidə Avropa Parlamentinin fransız üzvü Rima Hassan və Almaniya vətəndaşı Yasemin Acarla yanaşı, Türkiyədən Hüseyn Şüayb Ordu, Braziliyadan Tiago Avila, İspaniyadan Serxio Toribio, Niderlanddan Marko van Rennes, Fransadan Baptist Andre, Reva Viard, Paskal Muriéras və Yanis Mhamdi, İsveçli iqlim fəalı Qreta Tunberq və jurnalist Omar Faiad daxil olmaqla 12 nəfər olub.
