ALTAY tankının ardıcıl istehsalı və test işləri intensivləşdirilib

Türkiyədə ALTAY Döyüş Tankının ardıcıl istehsalına başlanıb və ilk çatdırılmaları Türk Silahlı Qüvvələrinə həyata keçirilib. Yerli güc qrupu üzərində test və inkişaf işləri isə intensiv şəkildə davam edir. ALTAY tankının ilkin istehsalı Cənubi Koreyadan tədarük edilən güc qrupu ilə həyata keçirilib. Proyekt çərçivəsində 85 tank bu güc qrupu ilə hazırlanacaq və sonradan tamamilə yerli güc qrupuna keçid planlaşdırılır.

29 Oktyabr 2025 12:37

BAKI, AzerVoice, Nailə Babazadə

AzerVoice xəbər verir ki, ALTAY tankının ilkin istehsalı Cənubi Koreyadan tədarük edilən güc qrupu ilə həyata keçirilib. Proyekt çərçivəsində 85 tank bu güc qrupu ilə hazırlanacaq və sonradan tamamilə yerli güc qrupuna keçid planlaşdırılır.

BMC Power şirkətində türk mühəndisləri və işçilərinin iştirakı ilə hazırlanmış 400 və 600 at qüvvəli yerli mühərriklər və 1000–1500 at qüvvəli güc qruplarının istehsal və inkişaf işləri davam edir. Yeni açılan BMC Ankara Tank və Yeni Nəsil Zirehli Nəqliyyat Vasitələri İstehsal Zavodunda ALTAY tankı, FIRTINA Obüsü, yeni nəsil zirehli vasitələr və müxtəlif tipli dəniz vasitələri üçün yerli mühərrik və transmissiya sistemləri istehsal olunacaq.

Quru vasitələri sahəsində isə ardıcıl istehsala başlanmış 400 at qüvvəli TUNA mühərriki ilə təchiz olunmuş VURAN və KİRPİ II zirehli vasitələri təhlükəsizlik qüvvələrinin istifadəsinə verilib.

Cənubi Koreyadan alınmış güc qrupu ALTAY tankının istehsalını 2028-ci ilə qədər təmin edə biləcək. BATU Güc Qrupunun yetkinlik səviyyəsinin isə 2026-cı ilin sonuna qədər yüksək səviyyəyə çatdırılması planlaşdırılır. BMC İdarə Heyətinin sədri Fuat Tosyalı ilk ALTAY təslimat mərasimində bu hədəfi vurğulayıb. 2026-cı ilin sonunda BATU güc qrupuna malik ALTAY tankının hazır olması nəzərdə tutulur.

BMC Power BATU güc qrupu ilə ALTAY tankını xarici güc qrupuna olan asılılıqdan azad etmək istiqamətində mühüm irəliləyiş əldə edib. Güc qrupunun mühərrikinin inkişaf işləri böyük ölçüdə tamamlanıb və laboratoriya və tank üzərində testlər müxtəlif standartlara uyğun olaraq davam edir. Transmissiya komponentinin inkişafı isə paralel olaraq aparılır.

BMC Power həm Arifiye Motor və Transmissiya Test Mərkəzi, həm də ALTAY tankı üzərində tam güc qrupu ilə testlər həyata keçirir. Bu çərçivədə BATU güc qrupuna malik ALTAY tankı hərəkət və yamaclara qalxma testləri də daxil olmaqla sınaqlardan keçirilir.