Bakı,AzerVoice
Bu gün Türkiyənin Mersin şəhərinin Tarsus rayonunda tikintisi başa çatan Çukurova Beynəlxalq Hava Limanının açılışı ediləcək.
AzerVoice xəbər verir ki, açılışı Türkiyə Prezidenti Rəcəb Tayyib Ərdoğan edəcək
Çukurova Hava Limanı təxminən 244,5 milyon avro sərmayə ilə inşa edilib . Hava limanının 25 il ərzində 297 milyon 100 min avro icarə gəliri əldə edəcəyi gözlənilir.
8 milyon sərnişin tutumuna malik olan hava limanı Adana və Mersin başda olmaqla Çukurova bölgəsinə xidmət göstərəcək. 800 hektar sahədə inşa edilən və CAT-II standartlarında 3500 metr uzunluğunda uçuş-enmə zolağına sahib olan hava limanı Türkiyənin ən əhəmiyyətli aviasiya investisiyalarından biri hesab olunur.
Hava limanı regionun turizm və ticarətinə mühüm töhfələr verəcək. Yük daşımalarının artması ilə ticarət həcminin də iki dəfə artacağı gözlənilir.
Xüsusilə təcili və kritik materialların hava nəqliyyatı ilə vaxtında çatdırılmasının təmin edilməsi tədarük zəncirlərinin fasiləsiz işləməsinə kömək edəcəkdir. Yerli biznesin qlobal bazarlara inteqrasiyası asanlaşacaq və onların ixrac potensialı artacaq.
