BAKI, AzerVoice
Suriya hökumətinin müdafiə qabiliyyətini gücləndirmək və bütün terror təşkilatlarına qarşı mübarizə aparmaq üçün Türkiyədən rəsmən dəstək istəyib.
AzerVoice xəbər verir ki, bu barədə Türkiyə Milli Müdafiə Nazirliyinin mətbuat və ictimaiyyətlə əlaqələr müşaviri və nazirliyin sözçüsü, admiral Zeki Aktürk İstanbul Sərgi Mərkəzində “IDEF 2025 17-ci Beynəlxalq Müdafiə Sənayesi Sərgisi” ilə bağlı keçirilən həftəlik mətbuat brifinqində çıxışında bildirib.
Türkiyənin Suriyanın ərazi bütövlüyünün qorunması, sabitliyin təmin edilməsi və terror təşkilatları ilə mübarizədə qətiyyətli mövqeyini davam etdirdiyini vurğulayarıb.
"Milli Müdafiə Nazirliyi olaraq, Suriyanın yeni hökuməti ilə sıx əməkdaşlıq içindəyik. Suriya rəhbərliyi tərəfindən müdafiə qabiliyyətinin gücləndirilməsi və başda İŞİD olmaqla bütün terror təşkilatlarına qarşı mübarizə məqsədilə Türkiyədən rəsmi dəstək tələb edilmişdir. Bu tələblə bağlı olaraq, Suriyanın müdafiə qabiliyyətinin artırılması üçün təlim, məsləhət və texniki dəstək verilməsi istiqamətində işlər davam edir. Türkiyənin əsas məqsədi Suriyanın siyasi birliyini və ərazi bütövlüyünü dəstəkləmək, bölgədə daimi sülhün təmin olunmasına yönəlmiş səylərə rəhbərlik etməkdir. ”- deyə Aktürk qeyd edib.
Suriyanın Suveyda şəhərindəki qarşıdurmalar və İsrailin Dəməşqə hücumları ilə bağlı sualları cavablandıran mənbələr, İsrailin son vaxtlar xüsusilə cənubdakı Suveyda bölgəsində intensivləşdirdiyi hücumların druz qrupları ilə Dəməşq hökuməti arasında gərginliyi artırdığını bildirib.
Xatırladaq ki, 13 iyul tarixində Suriyanın Suveyda vilayətində ərəb qəbilələrinin döyüşçüləri ilə druz dəstələri arasında qarşıdurmalar baş verib. İyulun 15-də Suriya ordusu vilayətin inzibati mərkəzinə daxil olaraq, bölgədə sabitliyi təmin etmək üçün əməliyyatlara başlayıb. Ardınca İsrail, druz əhalisini qorumaq məqsədi ilə Suriyanın hərbi kolonlarını hədəfə almağa başladığını bəyan edərək hava hücumları həyata keçirməyə başlayıb.
16 iyul tarixində İsrail Hərbi Hava Qüvvələri Dəməşq və onun ətrafındakı bir sıra strateji obyektlərə, o cümlədən Suriya ordusunun Baş Qərargah kompleksinə, Əbu-Rummana rayonundakı Prezident Sarayına və paytaxtın qərbində yerləşən Mezze hərbi hava bazasına hava zərbələri endirib. Bu zərbələr nəticəsində Suriya təhlükəsizlik qüvvələrinin beş əməkdaşı həlak olub.
Məlumat üçün bildirək ki, druzlar – Suriya, Livan, İsrail və İordaniyada yaşayan, ərəb dilli və dini baxımdan özünəməxsus etnokonfessional qrupdur. Suriyada təxminən 700 min druz yaşayır ki, bu da kürdlər və ələvilərdən sonra ölkədəki üçüncü ən böyük dini-etnik azlıqdır.
