BAKI, Azervoice, Nərmin Ağayeva
“Terrorsuz Türkiyə, terrorsuz bölgə deməkdir.”
Azervoice xəbər verir ki, Türkiyə Böyük Millət Məclisinin (TBMM) sədri Numan Kurtulmuş terrorla mübarizədə Türkiyənin göstərdiyi iradənin bölgədə sabitlik üçün həlledici əhəmiyyət daşıdığını bildirib. “Terrorsuz Türkiyə, sözün düzü, terrordan azad bir bölgə deməkdir”, – deyə o vurğulayıb.
TBMM-in Fəxri Salonunda keçirilən “Samsuna İstiqlal Medalının Təqdimetmə Mərasimi”ndə çıxış edən Kurtulmuş, son dövrdə terror təşkilatlarının bölgədə böyük güclərin vəkil aparatı kimi istifadə edildiyini qeyd edib. O bildirib ki, Türkiyə bu sxemi alt-üst edərək yeni bir tarixi mərhələnin əsasını qoyur.
Kurtulmuş həmçinin bildirib ki, terror təşkilatının özünü ləğv etməsi və bu prosesin TBMM çərçivəsində aparılması, terrorla dialoqu deyil, onun aradan qaldırılması üçün atılan addımın göstəricisidir. “Son 50 ildə Türkiyə 3 trilyon dollara yaxın iqtisadi itki ilə yanaşı, on minlərlə şəhid vermişdir. Bu acı təcrübədən dərs çıxarıb, birliyimizi və qardaşlığımızı möhkəmləndirməliyik”, – deyə o qeyd edib.
Qeyd edək ki, 1924-cü ildə TBMM tərəfindən Samsuna verilməsi qərara alınan, lakin təqdimatına dair sənəd tapılmayan İstiqlal medalı bu mərasimdə rəsmi şəkildə Samsun valisi Orxan Tavlıya təqdim olunub. TBMM sədri bu təltifi tarixi ədalətin bərpası kimi qiymətləndirib.
