BAKI, AzerVoice, Nailə Babazadə
Türkiyənin Xarici İşlər naziri Hakan Fidan bu gün Azərbaycanın Qəbələ şəhərində ev sahibliyi etdiyi Türk Dövlətləri Təşkilatının (TDT) 12-ci Zirvəsi ərəfəsində keçirilən TDT Xarici İşlər Nazirləri Şurasının iclasında iştirak edib və çıxış edib.
AzerVoice xəbər verir ki, çıxışı zamanı nazir Fidan Qəzzadə baş verən soyqırımın bütün dünyanın vicdanını sarsıtdığını vurğulayıb. O, bölgədə daimi atəşkəsin təmin olunmasının, humanitar yardımların qarşısının alınmadan bölgəyə çatdırılmasının və iki dövlətli həll yolunun həyata keçirilməsinin zəruriliyini qeyd edib.
Suriyanın ərazi bütövlüyü və birliyinə verdikləri önəmi xüsusi olaraq qeyd edən Fidan, bu istiqamətdə yaranan tarixi fürsətin düzgün dəyərləndirilməsinin və Suriya xalqının iqtisadi inkişaf yolunda dəstəklənməsinin vacibliyini bildirib.
Nazir əlavə edib ki, Suriyanın parçalanmasına yönəlmiş cəhdlərin qarşısının alınması və əhatəli bir siyasi prosesin qurulması üçün Türkiyə səylərini davam etdirəcək.
