BAKI,AzerVoice, Fərid Mikayılov
Türkiyədə son bir ay ərzində FETÖ terror təşkilatına qarşı keçirilən əməliyyatlar nəticəsində 286 nəfər saxlanılıb, onlardan 154-ü həbs edilib.
AzerVoice xəbər verir ki, Türkiyənin Daxili işlər naziri Ali Yerlikaya bu barədə sosial media hesabında paylaşım edib.
Onun sözlərinə görə, əməliyyatlar Respublika baş prokurorluqları ilə Daxili İşlər Nazirliyinin Təhlükəsizlik Baş İdarəsinə tabe olan Terrorla Mübarizə (TEM), Qaçaqmalçılıqla Mübarizə (KOM) və Kəşfiyyat İdarələrinin koordinasiyasında, Ankara, İstanbul və İzmir də daxil olmaqla 50 şəhərdə həyata keçirilib.
Nazir qeyd edib ki, son bir ayda aparılan əməliyyatlarda 286 şübhəli saxlanılıb, onlardan 154-ü barəsində həbs qətimkan tədbiri seçilib, 79 nəfər barəsində məhkəmə nəzarəti qərarı çıxarılıb, digərləri barədə isə hüquqi prosedurlar davam edir.
Nazir əlavə edib ki, əməliyyatlar zamanı FETÖ istintaqları çərçivəsində adı hallanan, ifadə və tanıma proseslərində müəyyən edilən, barəsində məhkəmənin həbs hökmü və ya axtarış qərarı olan şəxslər də saxlanılıb.
