BAKI, AzerVoice, Nailə Babazadə
Türkiyənin 45 vilayətində son iki həftə ərzində FETÖ terror təşkilatına qarşı keçirilən əməliyyatlar zamanı 178 nəfər saxlanılıb. Onlardan 67-si həbs edilib, 48 nəfər barəsində isə məhkəmə nəzarəti qərarı çıxarılıb. Digərlərinin istintaqı davam edir.
AzerVoice xəbər verir ki, Türkiyənin daxili işlər naziri ali Yerlikaya bildirib ki, əməliyyatlar Respublika Baş Prokurorluqları ilə Polis Baş İdarəsinin Terrorla Mübarizə (TEM), Qaçaqmalçılıq və Mütəşəkkil Cinayətlərlə Mübarizə (KOM) və Kəşfiyyat İdarələrinin koordinasiyasında, vilayət polis idarələrinin müvafiq şöbələri tərəfindən həyata keçirilib.
Son iki həftədə aparılan bu əməliyyatlar nəticəsində saxlanılan şəxslərin, təşkilatın gizli rabitə proqramı ByLock istifadəçiləri olduqları, FETÖ-nün “maliyyə, tələbə, aktual, hərbi və gizli” strukturlarında fəaliyyət göstərdikləri, həmçinin təşkilat rəhbərləri ilə ankesörlü telefon vasitəsilə əlaqə saxladıqları müəyyənləşdirilib.
Nazir Yerlikaya həmçinin vurğulayıb ki, əməliyyatlar zamanı ifadələrdə və tanınma proseslərində adı keçən, haqqında məhkəmənin qəti həbs qərarı və axtarış orderi olan şəxslər də yaxalanıb.
