BAKI,AzerVoice, Orxan Qədirzadə
Cənubi Kipr Rum İdarəsinin (GKRY) Prezidenti Nikos Xristodulidis Türkiyəyə əməkdaşlıq təklif edib.
AzerVoice xəbər verir ki, Cənubi Kipr prezidenti “Financial Times” qəzetinə verdiyi müsahibədə Ankara ilə əməkdaşlığa açıq olduqlarını bildirib. O, bölgədə sabitlik və dialoqun yalnız qarşılıqlı hörmət və Avropa İttifaqının hüquqi prinsipləri əsasında mümkün ola biləcəyini vurğulayıb.
Prezident Xristodulidis Aİ–Türkiyə münasibətlərində yeni mərhələnin başlaya biləcəyini qeyd edib.
“Coğrafiyanı dəyişmək mümkün deyil. Türkiyə həmişə Kiprin qonşusu olacaq. Biz Avropa İttifaqına yaxın bir qonşunu görmək istəyərik”, – deyə o bildirib.
O, GKRY-nin suverenliyinə və Avropa dəyərlərinə hörmət olunacağı təqdirdə iqtisadi əlaqələrin və təhlükəsizlik dialoqunun bərpa olunmasının mümkün olduğunu qeyd edib.
“İzolyasiya heç kimə fayda vermir. Daha yaxın tərəfdaşlığa doğru addım ata biləcəyimizə inanırıq. Qapıları bağlamırıq”, – GKRY lideri əlavə edib.
Məlumata görə, 2025-ci ilin yanvar ayında Avropa İttifaqının sədrlik missiyasını təhvil alacaq Cənubi Kipr, bu müddət ərzində Türkiyə Prezidentini və ya Xarici İşlər naziri səviyyəsində nümayəndələri qeyri-rəsmi Aİ toplantılarına dəvət etməyi planlaşdırır.
Türkiyə tərəfindən məsələyə müsbət reaksiya verilib. Ankara rəsmiləri Atina və Lefkoşadan gələn konstruktiv mesajları “məmnuniyyətlə qarşıladıqlarını” açıqlayıblar.
Xristodulidis həmçinin enerji sahəsində yeni regional əməkdaşlıq modellərinə işarə edib. O, İsrail və Yunanıstanın da iştirak edə biləcəyi üçtərəfli enerji formatının mümkün olduğunu, Cənubi Kiprin bu prosesdə fəal rol almaq niyyətində olduğunu deyib.
